आप्रवासी सेवा केन्द्रको अनुगमन

स्थानीय

गृहपृष्ठ
स्थानीय
आप्रवासी सेवा केन्द्रको अनुगमन

आप्रवासी सेवा केन्द्रको अनुगमन

शुक्रबार, जेठ २२, २०८३ बागेश्वरी पोस्ट

नेपालगञ्ज । जिल्ला प्रशासन कार्यालय बाँकेस्थित आप्रवासी सेवा केन्द्रको अनुगमन गरिएको छ । नेपालगञ्ज उपमहानगरपालिकाका उपसचिव गोर्ख बहादुर थापा, कार्यपालिका सदस्यद्वय बसन्त कनोजिया र मो. मुजम्मिल हुसेन हलवाई, प्रशासकीय अधिकृत कृष्ण प्रसाद जोशी, कानुन शाखा प्रमुख माया शर्मा, रोजगार संयोजक मञ्जु ज्ञवाली, अधिकृत शान्ति केसी, सुरक्षित आप्रवासन (सामी) का जिल्ला कार्यक्रम संयोजक कमल सिंह नेपाली सहितको टोलीले आप्रवासन सेवा केन्द्रको अवलोकन गरेको हो ।

अनुगमनका क्रममा सेवा प्रवाह अवस्थाको स्थलगत निरीक्षण, कार्यालय ब्यवस्थापन लगायतको अवलोकन गरिएको थियो । नेपालीका अनुसार आप्रवासी स्रोत केन्द्र सामीको ‘मुटु’ हो जहाँबाट वैदेशिक रोजगारका सम्भावित कामदारले आवश्यक सूचना र परामर्श पाइरहेका छन् । त्यहाँ दुई जना कर्मचारी कार्यरत छन् । आस्था पोखरेल र विनिता बस्नेत परामर्शकर्ताको रुपमा कार्यरत छन् । सामीका जिल्ला कार्यक्रम संयोजक नेपालीका अनुसार आप्रवासी स्रोत केन्द्रबाट सम्भावित कामदारलाई वैदेशिक रोजगारी सम्बन्धि सूचना, परामर्श र जानकारी प्रदान गरिन्छ । ‘वैदेशिक रोजगारीमा जाने सम्भावित कामदारलाई काउन्सिलिङ्ग गर्छौं,’ नेपालीले भने । सुरक्षित आप्रवासन (सामी) कार्यक्रमले यसमा सहजीकरण गरिरहेको छ । २०७५ सालदेखि यो सेवा उपलब्ध भइरहेको छ ।

सुरक्षित आप्रवासन (सामी) कार्यक्रमले वैदेशिक रोजगारीलाई सुरक्षित र मर्यादित बनाउन सूचनामा पहुँच, न्यायमा पहुँच (कानुनी सहजीकरण), सीप विकास तालिम, मनोसामाजिक परामर्श र वित्तीय साक्षरतामा काम गरिरहेको छ । सामी कार्यक्रम नेपाल सरकार र स्विस सरकारको द्विपक्षीय सम्झौता अन्तर्गत सञ्चालनमा छ । यो श्रम, रोजगार तथा सामाजिक सुरक्षा मन्त्रालय र स्थानीय सरकारको नेतृत्वमा कार्यान्वयन भइरहेको छ । कार्यक्रमलाई स्विस सरकारको तर्फबाट प्राविधिक सहयोग हेल्भेटास नेपालले उपलब्ध गराएको छ ।

प्रकाशित मिति: शुक्रबार, जेठ २२, २०८३ २१:१४

प्रतिक्रिया दिनुहोस्