भोटेकोशी बाढी अपडेट -शनिबार बिहानसम्म १३ सय ४४ शव फेला: प्रहरी

समाचार

गृहपृष्ठ
समाचार
भोटेकोशी बाढी अपडेट -शनिबार बिहानसम्म १३ सय ४४ शव फेला: प्रहरी

भोटेकोशी बाढी अपडेट -शनिबार बिहानसम्म १३ सय ४४ शव फेला: प्रहरी

शनिबार, भदौ २०, २०८३ बागेश्वरी पोस्ट

काठमाडौं । रसुवाको भोटेकोशी नदीमा आएको विनाशकारी बाढीपछि विभिन्न जिल्लामा खोज तथा उद्धारका क्रममा हालसम्म १ हजार ३ सय ४४ जनाको शव फेला परेको छ । शनिबार बिहान ५ बजेसम्म प्राप्त विवरण अनुसार रसुवामा १ सय ६०, नुवाकोटमा १ सय ९२, धादिङमा ६७, चितवनमा ३ सय ६०, गोरखामा ७३, तनहुँमा ३८, नवलपरासी पूर्वमा २ सय २२ र नवलपरासी पश्चिममा २ सय ३० जनाको शव फेला परेको नेपाल प्रहरीले जनाएको छ ।

फेला परेका शवको पहिचानका लागि मृतक तथा आफन्तबाट डीएनए नमुना संकलन गर्ने लगायतका प्रक्रिया अघि बढाइएको छ । हालसम्म मृतकका १ हजार २ सय ६० र आफन्तका ९ सय ७२ गरी कुल २ हजार २ सय ३२ वटा डीएनए नमुना संकलन गरिएको छ ।

पहिचान तथा आवश्यक प्रक्रिया पूरा गरिएका शवमध्ये हालसम्म १ हजार ३० वटा शव व्यवस्थापन गरिएको छ । व्यवस्थापन गरिएका शवमा २ सय २२ महिला, ३ सय ५५ पुरुष र ४ सय ५३ जनाको लिङ्ग पहिचान खुल्न नसकेको विवरण रहेको प्रहरीले जनाएको छ ।

यसैबीच पहिचान हुन नसकेका १ हजार २ सय ७० शवको विवरण नेपाल प्रहरीको वेबसाइटमा समेत राखिएको छ । बाढी प्रभावित क्षेत्रमा उद्धार, खोजी, राहत वितरण तथा शव व्यवस्थापन लगायतका कामका लागि हालसम्म ७ हजार ९ सय १२ जना प्रहरी कर्मचारी परिचालन गरिएको छ ।

बाढीपछि अझै ४ हजार ८ सय ९८ जना बेपत्ता रहेको जनाइएको छ । उनीहरूको खोजी कार्य जारी रहेको प्रहरीले जनाएको छ । यसैगरी विभिन्न जिल्लामा स्थापना गरिएका होल्डिङ सेन्टरमा हाल ३ हजार ६ सय ५५ जना व्यक्तिलाई राखिएको विवरण सार्वजनिक गरिएको प्रहरीले जनाएको छ ।

प्रकाशित मिति: शनिबार, भदौ २०, २०८३ ०७:२७

प्रतिक्रिया दिनुहोस्