पूर्वराजा शाहले कोरोना रोकथाम कोषमा दुई करोड रुपैयाँ सहयोग

समाचार

गृहपृष्ठ
समाचार
पूर्वराजा शाहले कोरोना रोकथाम कोषमा दुई करोड रुपैयाँ सहयोग

पूर्वराजा शाहले कोरोना रोकथाम कोषमा दुई करोड रुपैयाँ सहयोग

मंगलबार, चैत १८, २०७६ बागेश्वरी पोस्ट

पूर्वराजा ज्ञानेन्द्र शाह

काठमाडौं । सरकारले खडा गरेको कोरोना रोकथाम तथा नियन्त्रण कोषमा पूर्वराजा ज्ञानेन्द्र शाहले दुई करोड रुपैयाँ सहयोग गर्ने घोषणा गरेका छन् ।

पूर्वराजा शाहले आफ्नी बुहारी हिमानीको नाममा रहेको हिमानी कोषबाट उक्त रकम दिने घोषणा मंगलबार साँझ एक सन्देश जारी गर्दै सार्वजनिक गरेका हुन् ।

कोरोना भाइरसको महामारीले सिङ्गो मानव सभ्यता र विकासलाई नै गम्भीर चुनौती दिएको उल्लेख गर्दै उनले सबैलाई यसको विरुद्ध योगदान दिन आह्वान गरेका छन् ।

‘देश र जनतामा यस महामारीले भय र सन्त्रास पैदा गराएको छ,’ उनले वक्त्वयमा भनेका छन्, ‘मानव अस्तित्व रक्षाका निम्ति भई रहेको पहल प्रति संवेदनशील हुँदै हामी सबैले आ-आफ्नो ठाउँ र क्षमताबाट केही न केही योगदान पुर्‍याउनु अनिवार्य भइसकेको छ ।’

उनको सन्देशमा अगाडि भनिएको छ,‘ यो अवस्थाबाट मुक्त हुन लकडाउन नै वाध्यात्मक अनिवार्यता भएको हामी सबैले बुझेका छौं र यसको पालनामा गैह्रजिम्मेवार हुने छुट कसैलाई पनि छैन भन्ने बुझ्नु पनि जरूरी छ।’

महामारीको यो संकटमा आफ्नो ज्यानको प्रवाह नगरी अहोरात्र सेवामा खट्ने चिकित्सक, नर्स र अन्य स्वास्थ्यकर्मी तथा नेपाली सेना, नेपाल प्रहरी र सशस्त्र प्रहरीलगायत सम्पूर्ण सुरक्षाकर्मीका साथै जनतालाई समयमै सुसूचित गरेर योगदान पुर्‍याउने सञ्चारकर्मी एवम् पत्रकारहरूप्रति पूर्वराजा शाहले आभार व्यक्त गरेका छन् ।

उनले भने, ‘राहत, उद्धार र ब्यवस्थित बन्दोबस्त जुटाउन सरकारी र गैह्रसरकारी सबै पक्षबाट समन्वयकारी ढंगमा मानवीय सेवा सहयोगमा काम भै रहेको बेलामा यसको प्रशंसा गर्दै यसलाई अझै प्रभावकारी बनाउन हामी अनुरोध गर्दछौं ।’

उनको सन्देशमा भनिएको छ,‘दु:ख-कष्ट र आपत-विपदको यो घडीमा सबैका साथमा साथ दिदै हाम्रो तर्फबाट हिमानी कोषलाई रू २ करोड दिई नेपाल सरकारको कोरोना भाइरस संक्रमण, रोकथाम, नियन्त्रण र उपचार कोषमा दाखिला गर्न बुझाएका छौं । यस कार्यले पनि केही सहयोगी भूमिका रहने विश्वास लिएका छौं।’ साझापोष्टबाट

प्रकाशित मिति: मंगलबार, चैत १८, २०७६ १९:५६

प्रतिक्रिया दिनुहोस्