सरकारले आफ्नै निर्णय उल्टायो, अव सर्वसाधारणलाई काठमाडौं बाहिर जान नदिने

समाचार

गृहपृष्ठ
समाचार
सरकारले आफ्नै निर्णय उल्टायो, अव सर्वसाधारणलाई काठमाडौं बाहिर जान नदिने

सरकारले आफ्नै निर्णय उल्टायो, अव सर्वसाधारणलाई काठमाडौं बाहिर जान नदिने

बिहीबार, चैत २७, २०७६ बागेश्वरी पोस्ट

काठमाडौं । भौतिक पूर्वाधार तथा यातायातमन्त्री वसन्तकुमार नेम्वाङले ‘लकडाउन’ का कारण अलपत्र परेका नागरिकलाई शुक्रबार र शनिबार काठमाडौँ उपत्यकाबाट बाहिर जान दिइने सम्बन्धमा कुनै निर्णय नभएको बताएका छन् ।

सो सम्बन्धमा निर्णय भएको भनी विभिन्न सञ्चारमाध्यममा समाचार प्रकाशित भएपछि मन्त्री नेम्वाङले यस विषयमा निर्णय नभएको प्रष्ट पारेका हुन्। ‘लकडाउन’ को समयमा जनताले दुःख पाइरहेकाले यस किसिमको सुझाव आउनु स्वभाविक भएको उनले बताए ।

आफूले पनि सञ्चारमाध्यमबाट सयौँ किलोमिटर हिँडेरै घर जान लागेको जानकारी पाइरहेको उनले बताए । उनले भने, ‘आगामी वैशाख ३ गतेसम्म लकडाउन भएकाले त्यसपछिको अवस्था हेरेर थप निर्णय हुनेछ ।’

गृह मन्त्रालयले पनि बिहीबार साँझ विज्ञप्ति जारी गरेर काठमाडौंबाट उपत्यका बाहिर जान दिने भन्ने कुनै निर्णय नभएको जनाएको छ ।

‘काठमाडौं उपत्यकामा अलपत्र परेका नागरिकहरुलाई भोलि शुक्रबार र पर्सी शनिबार काठमाडौं उपत्यकाबाट बाहिर पठाउने निर्णय भएको भनी केही संचार माध्यममा प्रसारित समाचारप्रति यस मन्त्रालयको ध्यानाकर्षण भएको छ’, विज्ञप्तिमा भनिएको छ ।

‘काठमाडौं उपत्यकामा विभिन्न कारणले रोकिएका नागरिकहरूलाई उपत्यका बाहिर पठाउने सम्बन्धमा कुनै पनि निर्णय नभएको व्यहोरा सम्बन्धित सबैमा जानकारीका लागि अनुरोध छ’, गृह मन्त्रालयको सह–प्रवक्ता उमाकान्त अधिकारीद्वारा जारी विज्ञप्तिमा भनिएको छ ।

यसअघि, मन्त्रिपरिषद् कार्यालयको कार्यालयको फेसबुक पेजमा शुक्रबार र शनिबार दुई दिन काठमाडौं उपत्यकाबाट बाहिर जान चाहनेलाई जान दिने भनेर उल्लेख गरिएको थियो ।

प्रकाशित मिति: बिहीबार, चैत २७, २०७६ १९:४९