डुडुवामा हात्तीपाइले रोग निवारण कार्यक्रम शुरु

स्थानीय

गृहपृष्ठ
स्थानीय
डुडुवामा हात्तीपाइले रोग निवारण कार्यक्रम शुरु

डुडुवामा हात्तीपाइले रोग निवारण कार्यक्रम शुरु

२२ प्रतिशत लक्ष्य हासिल गरिने

आइतबार, फागुन १६, २०७७ बागेश्वरी पोस्ट

डुडुवा (बाँके) । हात्तीपाइले रोग निवारण कार्यक्रम अन्तर्गत् आम औषधि सेवन अभियान यस वर्ष पनि शुरु भएको छ । उक्त अभियानलाई सफल पार्न गाउँपालिकास्तरीय अभिमुखीकरण तथा योजना तर्जुमा गोष्ठी गरिएको छ । डुडुवा गाउँपालिका स्वास्थ्य शाखाद्वारा आज आयोजित कार्यक्रममा यस वर्ष सतप्रतिशत लक्ष्य हासिल गर्न हात्तीपाइले रोगविरुद्धको आम औषधि सेवन कार्यक्रमलाई प्रभावकारी बनाइने भएको छ । कार्यक्रममा गाउँपालिका अध्यक्ष नरेन्द्रकुमार चौधरीले हात्तीपाइले रोगबाट बच्नका लागि औषधिको सेवन गर्न सबैलाई अनुरोध गर्दै गाउँटोलका आम नागरिकलाई औषधिको फाइदा र सेवनबारे सचेतना फैलाउन जरुरी रहेको बताउनुभयो । नागरिक सचेतनाका लागि हामी सबै जनप्रतिनिधि, शिक्षक, नागरिक अगुवाको भूमिका बढी प्रभावकारी भएकाले यो अभियानलाई सफल बनाउनमा सहयोग गर्नुपर्नेमा जोड दिनुभयो । स्वास्थ्य कार्यलय बाँकेका प्रमुख धीरजंग शाहले निर्धक्कका साथ औषधि सेवन गर्न आग्रह गर्दै कुनै पनि भ्रमका पछि नलाग्न अनुरोध गर्नुभयो । उहाँले विगत वर्षदेखि नियमितरुपमा कार्यक्रम संचालन भएपनि बाँके जिल्लाले सतप्रतिशत उपलब्धि हासिल गर्न नसकेकोप्रति चिन्ता व्यक्त गर्दै यस वर्ष लक्ष्य हासिल गर्न सबैको भूमिकाको आवश्यकता रहेको बताउनुभयो । कार्यक्रममा स्वास्थ्य शाखाका सहसंयोजक विरेन्द्र घलेले औषधि सेवनका बारेमा प्रस्तुतीकरण गर्नुभएको थियो । कार्यक्रममा गाउँपालिकाका जनप्रतिनिधि, शिक्षक, कर्मचारी, नागरिक समाज लगायतको सहभागिता रहेको थियो । बाँकेमा यही चैत्र २० गतेदेखि हात्तीपाइले रोगविरुद्धको औषधि खुवाउने कार्यक्रम रहेको छ । डुडुवा गाउँपालिकाले अहिलेसम्म ७७ प्रतिशत उपलब्धि हासिल गरिसकेको छ भने सतप्रतिशत लक्ष्य हासिल गर्न यस वर्ष २२ प्रतिशत पूरा गर्ने लक्ष्य रहेको स्वास्थ्य शाखा प्रमुख धनबहादुर बुढाले बताउनुभयो । उहाँका अनुसार डुडुवाका करिब ४४ हजार नागरिकलाई औषधि खुवाइनेछ । त्यसका लागि ४२ जना कर्मचारी र ६० जना महिला स्वास्थ्य स्वयंसेविका खटाइनेछ ।

प्रकाशित मिति: आइतबार, फागुन १६, २०७७ १९:२५

प्रतिक्रिया दिनुहोस्