लैंगिक हिंसा विरुद्ध सम्वाद:स्थानीय सरकार थप जिम्मेवार बन्नुपर्नेमा जोड

स्थानीय

गृहपृष्ठ
स्थानीय
लैंगिक हिंसा विरुद्ध सम्वाद:स्थानीय सरकार थप जिम्मेवार बन्नुपर्नेमा जोड

लैंगिक हिंसा विरुद्ध सम्वाद:स्थानीय सरकार थप जिम्मेवार बन्नुपर्नेमा जोड

शुक्रबार, फागुन २१, २०७७ बागेश्वरी पोस्ट

नेपालगञ्ज । लैंगिक हिंसा नियन्त्रणका लागि स्थानीय सरकार थप जिम्मेवार बन्नुपर्नेमा जोड दिइएको छ ।

अन्तर्राष्ट्रिय महिला दिवसका सन्दर्भमा सम्वाद समूह बाँकेद्वारा आज नेपालगञ्जमा आयोजित लैंगिक हिंसा नियन्त्रणका लागि स्थानीय तह र सरोकारवाला निकाय विषयक अन्तरक्रियात्मक सम्वादमा सहभागी सम्वद्ध सरोकार व्यक्तिहरुले सो कुरा बताएका हुन् ।

'महिला नेतृत्व कोभिड-१९ को संसारमा समान भविष्यप्राप्ति' भन्ने मूल नाराका साथ भएको कार्यक्रममा स्थानीय तहका उपाध्यक्ष, न्यायिक समितिका संयोजक, सम्वद्ध सरकारी कार्यालयका प्रमुख, अधिकारकर्मी, सुरक्षाकर्मी, हिंसा विरुद्ध क्रियाशील संघसंस्थाका प्रतिनिधि, कानुन व्यवसायी, शिक्षक लगायतको सहभागिता रहेको थियो । बढदो यौन हिंसा नियन्त्रणमा स्थानीय सरकार र सरोकारवाला बीचको प्रभावकारी समन्वय र सहकार्य अनिवार्य रहेको आवश्यकता औंल्याइएको थियो । अधिकांश सहभागीरुले हिंसा नियन्त्रण र पीडितको न्यायका लागि सरोकार पक्षले आ-आफनो स्थानबाट अग्रसरता देखाएपनि प्रमुख दायित्व स्थानीय सरकारको भएकाले थप सम्वदेनशील र जिम्मेवार बन्नुपर्ने सुझाव दिएका थिए ।

नेपालगञ्ज उपमहानगरपालिका महिला तथा बालबालिका शाखाकी प्रमुख महिला विकास अधिकृत शोभा शाहले लैंगिक हिंसा, समग्र अवस्था, कानुनी प्रावधान र प्रयोग तथा सरोकारवीचको सहकार्यको पाटोमा कार्यपत्र प्रस्तुत गरेपछि व्यापक विमर्श गरिएको थियो ।

खजुरा गाउँपालिका उपाध्यक्ष एवं सम्वाद सदस्य एकमाया विकले यौन हिंसाका घटनामा पीडितलाई न्याय दिलाउन अनेकन चुनौति देखिएपनि सामूहिक सहकार्यबाटै हिंसा रोक्न सकिने विश्वास व्यक्त गर्नुभयो ।

सरकारी वकिल कार्यालयका जिल्ला न्यायाधिवक्ता वासुदेव शर्माले हिंसाका घटनामा प्रहरीको अनुसन्धान प्रभावकारी बनाउन सकियो भने कानुनी कारवाहीमा समस्या नहुने स्पष्ट पार्नुभयो ।

जिल्ला शिक्षा समन्वय इकाईका प्रमुख रामसुरेश यादवले शिक्षकमार्फत् पनि लैंगिक हिंसा नियन्त्रणका कार्यक्रम सञ्चालन गर्न सकिने भएकोले त्यस्ता कार्यक्रम सञ्चालनको बातावरण बनाउन आह्वान गर्नुभयो ।

सम्वाद समूह बाँकेका सहजकर्ता शुक्रऋषि चौलागाईद्वारा सहजीकरण गरिएकोे कार्यक्रममा जिल्ला वार अध्यक्ष जनक बहादुर शाही, जिल्ला कानुनी सहायता समितिका अधिवक्ता मान वहादुर बुढा, नेपाल मानव अधिकार संगठन बाँकेका सभापति अधिवक्ता प्रहलाद वहादुर कार्की, जिल्ला प्रहरी अन्तर्गत् जेष्ठ नागरिक सेवा केन्द्रकी प्रमुख श्यामा पाइजा मगर, भेरी अस्पताल एकद्वार संकट व्यवस्थापन केन्द्रकी प्रतिनिधि कविता पौडेल, भानु माविकी शिक्षिका गीता अर्याल, अधिकारकर्मी कमला पन्त लगायतले आ-आफनो विचार, अनुभव र सुझाव राख्नुभएको थियो ।

प्रकाशित मिति: शुक्रबार, फागुन २१, २०७७ २०:१८