नेपालगन्ज उच्च अदालत बारमा कार्यभार हस्तान्तरण

स्थानीय

गृहपृष्ठ
स्थानीय
नेपालगन्ज उच्च अदालत बारमा कार्यभार हस्तान्तरण

नेपालगन्ज उच्च अदालत बारमा कार्यभार हस्तान्तरण

सोमबार, चैत ३०, २०७७ बागेश्वरी पोस्ट

नेपालगन्ज । नेपालगन्ज उच्च अदालत बार एसोसिएसनका नवनिर्चाचित पदाधिकारी र सदस्यहरुलाई कार्यभार हस्तान्तरण गरिएको छ ।

विकास आचार्य नेतृत्वको निवर्तमान कार्यसमितिले शिव श्रेष्ठ नेतृत्वको नयाँ कार्यसमितिलाई कार्यभार हस्तान्तरण गरेको हो । आज आयोजित कार्यभार हस्तान्तरण तथा ग्रहण समारोहमा निवर्तमान अध्यक्ष आचार्यले हस्तान्तरण गर्नुभएको कार्यभार नवनिर्वाचित अध्यक्ष श्रेष्ठले ग्रहण गर्नुभएको थियो । उच्च बारमा २७ वर्षपछि सर्वसम्मत नेतृत्व चयन भएको हो ।

उक्त समारोहमा साझा र सर्वसम्मत बार बनाएर कानुन व्यवसायीहरुले अनुकरणीय सन्देश दिएको भन्दै प्रशंसा गरिएको थियो । त्यस अवसरमा नवनिर्वाचितहरुलाई शुभकामना दिंदै अतिथिहरुले बारको गरिमा उजिल्याउँदै कानुन व्यवसायीहरुको हकहितमा उत्कृष्ट काम गर्न सुझाएका थिए । उच्च अदालत तुलसीपुर नेपालगन्ज इजलासका वरिष्ठतम् न्यायाधीश रत्न बहादुर बागचनको प्रमुख आतिथ्यतामा भएको कार्यक्रममा नेपाल बार एसोसिएसनका केन्द्रिय उपाध्यक्ष सुनिल कुमार श्रेष्ठ, सत्य निरुपण तथा मेलमिलाप आयोगकी सदस्य विष्णु पोख्रेल, वरिष्ठ अधिवक्ता गिरिवरप्रसाद अग्रवाल, गोपालकृष्ण घिमिरे, नेपाल बारका पूर्व उपाध्यक्षहरु टिकाजंग सिंह, सुरेश कुमार पौडेल, प्रह्लाद बहादुर कार्की, निर्वाचन समितिका प्रमुख अर्जुन पोखरेल, पत्रकार नवीन गिरी लगायतले शुभकामना दिनुभएको थियो । निवर्तमान अध्यक्ष आचार्य र नवनिर्वाचित अध्यक्ष श्रेष्ठले पनि मन्तब्य ब्यक्त गर्नुभएको थियो ।

निवर्तमान कोषाध्यक्ष सुदिप कुमार भट्टराईले स्वागत मन्तव्य ब्यक्त गर्नुभएको कार्यक्रमको संचालन निवर्तमान सचिव चित्र बहादुर शाही र नवनिर्वाचित सचिव पदम पाण्डेले गर्नुभएको थियो । हालै सम्पन्न नेपालगन्ज उच्च अदालत बार एसोसिएसनको अधिवेशनबाट अध्यक्षमा शिव कुमार श्रेष्ठ, उपाध्यक्ष चित्र बहादुर केसी, सचिव पदम पाण्डे, कोषाध्यक्ष सुर्जलाल थारु तथा सदस्यहरुमा विक्रम भण्डारी, राकेश कुमार सोनी, अमृता केसी, कर्ण बहादुर केसी, पुरुषोत्तम डाँगी, रामचन्द्र घिमिरे, गणेशमान केसी, मोहन अर्याल र कुम्भराज मिश्र सर्वसम्मत निर्वाचित हुनुभएको थियो ।

प्रकाशित मिति: सोमबार, चैत ३०, २०७७ २२:२७