नेपालगञ्जको प्रमुख प्रशासकीय अधिकृतमा रेग्मी

स्थानीय

गृहपृष्ठ
स्थानीय
नेपालगञ्जको प्रमुख प्रशासकीय अधिकृतमा रेग्मी

नेपालगञ्जको प्रमुख प्रशासकीय अधिकृतमा रेग्मी

शुक्रबार, वैशाख ३, २०७८ बागेश्वरी पोस्ट

नेपालगञ्ज । नेपालगञ्ज उपमहानगरपालिकाको प्रमुख प्रशासकीय अधिकृतको रुपमा सहसचिव हिरालाल रेग्मी सरुवा भई आउनुभएको छ ।

प्रमुख प्रशासकीय अधिकृत रेग्मीलाई आज नेपालगञ्ज उपमहानगरपालिाकामा स्वागत गरिएको छ । सुदुरपश्चिम प्रदेश प्रमुखको कार्यालयमा सरुवा हुनुभएका प्रमुख प्रशासकीय अधिकृत ओमवहादुर खड्काको विदाई गरिएको छ ।

नगर प्रमुख डा. धवलशम्शेर राणा, उपप्रमुख उमा थापा मगर लगायतले रेग्मीको स्वागत र खड्काको विदाई गर्नुभयो । २०५७ सालमा शाखा अधिकृतबाट निजामती सेवामा प्रवेश गर्नुभएका रेग्मीसंग लामो समयसम्म संघीय मामिला तथा स्थानीय विकास मन्त्रालयमा काम गरेको अनुभव छ । रेग्मीले जिल्ला विकास समिति कालिकोट, अछाम, सुर्खेत, गुल्मी र दैलेखमा स्थानीय विकास अधिकारीको रुपमा काम गर्नुभयो भने धनगढी, टिकापुर, धरान नगरपालिकामा प्रमुख प्रशासकीय अधिकृतको रुपमा काम गर्नुभयो ।

२०६६ सालमा उपसचिव हुनुभएका रेग्मी २०७६ सालमा सहसचिव हुनुभएको हो । सहसचिव भएपछि गृह मन्त्रालय हुँदै सुर्खेतको प्रमुख जिल्ला अधिकारीको जिम्मेवारी निर्वाह गर्नुभएका रेग्मी यसअघि कर्णाली प्रदेशमा आर्थिक मामिला तथा योजना मन्त्रालयको सचिवको रुपमा कार्यरत रहनुभएको थियो ।

२०५९ सालमा घरेलु कार्यालय नेपालगञ्जमा उद्योग अधिकृतको रुपमा एक वर्ष काम गरेको अनुभव भएका रेग्मीले नेपालगञ्जबारे आफू पूर्णरुपमा जानकार रहेको बताउनुभयो । नेपालगञ्जलाई मुलुककै प्रमुख आर्थिक नगरीको रुपमा विकास गर्न, महानगरको रुपमा विकास गर्न, ग्रामीण वस्तीमा विकास द्रुत गतिमा अघि बढाउन, शिक्षा, स्वास्थ्यको हब बनाउनका लागि सबैको साथ र सहयोग आवश्यक पर्ने भन्दै उहाँले प्रमुख प्रशासकीय अधिकृतको रुपमा आफू समन्वयकारी भूमिकामा रहने बताउनुभयो ।

प्रकाशित मिति: शुक्रबार, वैशाख ३, २०७८ १७:००