अक्सिजन सिलिन्डरको अभावले भेरी अस्पतालमा केहीबेर तनाव

स्थानीय

गृहपृष्ठ
स्थानीय
अक्सिजन सिलिन्डरको अभावले भेरी अस्पतालमा केहीबेर तनाव

अक्सिजन सिलिन्डरको अभावले भेरी अस्पतालमा केहीबेर तनाव

बिहीबार, वैशाख ९, २०७८ बागेश्वरी पोस्ट

नेपालगन्ज । नेपालगन्जको भेरी अस्पतालमा आज अक्सिजन सिलिण्डर आपूर्तिकर्ताले समयमै सिलिण्डर उपलब्ध नगराउँदा करिब २ घण्टा तनावपूर्ण स्थिति सिर्जना भएको छ । अक्सिजन सिलिण्डर सप्लायर्सको प्लान्टमा विद्युत् ट्रान्सफर्मर बिग्रिएपछि सिलिण्डर भर्न नपाउँदा आपूर्तिमा समस्या भएको बताइएको छ ।

अस्पतालका डा.पारस पाण्डेका अनुसार सप्लायर्सले ठूलो खालको सिलिण्डर समयमै उपलब्ध नगराउँदा अक्सिजन व्यवस्थामा केही चुनौती देखा परेको हो । उनका अनुसार स्टकमा सानो सिलिण्डर रहेकाले धेरै जटिल समस्या भने परेन । ‘ठूलो सिलिण्डर सबै खाली भएपछि हामीले सानो सिलिण्डर जोडेर बिरामीलाई अक्सिजनको अभाव हुन दिइएनौं,’ उनले भने, ‘तर, यो घटनाले विकल्प खोज्नुपर्छ र सतर्क रहनुपर्छ भनेर पाठ भने सिकाएको छ।’

कोभिड वार्डमा पछिल्लो समय बिरामीको चाप बढेसँगै दैनिक अक्सिजनको माग पनि बढेको छ । सामान्य अवस्थामा अस्पतालमा दैनिक १० देखि १५ वटा ठुला अक्सिजन सिलिण्डर मात्रै प्रयोग हुने भएपनि अहिले प्रतिदिन साढे २ सयदेखि ३ सयको हाराहारीमा सिलिण्डर खपत हुने गरेको अस्पतालका मेडिकल सुपरिटेन्डेन्ट डा. प्रकाश थापाले बताए ।

डा. थापाका अुनसार नेपालगन्जमा दुईवटा मात्रै अक्सिजन सिलिण्डर सप्लायर्स छन् । ती दुवैले भारतको एउटै कम्पनीबाट लिक्विड अक्सिजन आपूर्ति गरेर सिलिण्डर भरेर नेपालगन्जका विभिन्न अस्पतालमा दिने गर्छन् । नेपालगन्ज मेडिकल कलेज, विभिन्न नर्सिङ होम लगायत अन्य अस्पताललाई पनि ती दुई सप्लायर्सकै भरमा छन् ।

‘हामीसँग अक्सिजन प्लान्ट नभएकोले अरुको भर पर्नु पर्दा अहिलेको अवस्थामा केही तनाव र चिन्ता बढेको छ,’ डा। थापाले भने, ‘माग अनुसार आपूर्ति भएन भने अक्सिजन नपाएर सिकिस्त बिरामीहरुको मृत्यु हुने खतरा नै हुन्छ।’उनका अनुसार अस्पतालसँग विकल्पको रुपमा एकैपटकमा ठूलो संख्यामा स्टक राख्ने क्षमता पनि छैन । दैनिक २०/३० सिलिन्डर ल्याउने, प्रयाग गर्ने अनि खाली सिलिण्डर फेरि भर्न प्लान्टमा पठाउने गरिन्थ्यो।

त्योभन्दा अर्को विकल्प नरहेको उनले सुनाए । डा. थापाले सिलिण्डर स्टक राख्ने ठाउँको समेत अभाव रहेको बताए । ‘त्यसमा पनि ठूला खाले सिलिण्डर नै धेरै संख्यामा छैन । सिलिण्डर भर्ने, लोड गर्ने झन्झटीलो प्रक्रिया छ,’ उनले भने, ‘अस्पतालले यसको विकल्पमा लिक्विड अक्सिजन ट्यांक राख्ने योजना बनाएको छ ।’

डा. थापाका अनुसार भारतमा नै धेरै अक्सिजन खपत भइरहेको अवस्थामा नेपालमा लिक्विड अक्सिजन आपूर्ति गर्न पनि चुनौति हुनसक्ने चिन्ता व्यक्त गरे । ‘बिरामी बढ्दै गएका छन् । अक्सिजन सप्लायर्सको विकल्प बेलैमा सोच्नु आवश्यक छ ।’ उनका अनुसार सप्लाई प्लान्टको क्षमता दैनिक चार सय सिलिण्डर भर्ने रहेको छ । अहिले भेरी अस्पतालमै ६० भन्दा बढी बिरामीलाई निरन्तर अक्सिजनको आवश्यकता रहेको छ । कान्तिपुरबाट।

प्रकाशित मिति: बिहीबार, वैशाख ९, २०७८ १९:०३

प्रतिक्रिया दिनुहोस्