डुडुवामा सीमा नाका अन्तरगतका हेल्थ डेस्कको अनुगमन

स्थानीय

गृहपृष्ठ
स्थानीय
डुडुवामा सीमा नाका अन्तरगतका हेल्थ डेस्कको अनुगमन

डुडुवामा सीमा नाका अन्तरगतका हेल्थ डेस्कको अनुगमन

मंगलबार, वैशाख १४, २०७८ बागेश्वरी पोस्ट

डुडुवा (बाँके) । कोरोना संक्रमणको जोखिम उच्चरुपमा बढ्न थालेपछि त्यसको न्यूनीकरण तथा सावधानीका लागि अपनाइएका संयन्त्रहरुको आज अनुगमन गरिएको छ ।

डुडुवा गाउँपालिकाले सीमासंग जोडिएका नाका तथा स्थानहरुमा नेपाल आवतजावत गर्नेहरुको अवस्था तथा केही महिना अघि स्थापना गरिएका हेल्थ डेस्कहरुको आज अनुगमन गरिएको हो ।

गाउँपालिकाले सीमासंग जोडिएको हेलियाको नयाँ बस्ती, छोटी भन्सार र हिरिमिनियाको उद्युमगन्जमा स्थापना गरिएको हेल्थ डेस्कको अनुगमन तथा संक्रमणको अवस्थाबारे अनुगमन गरिएको स्वास्थ्य शाखा प्रमुख धनबहादुर बुढाले बताउनुभयो ।

गाउँपालिका अध्यक्ष नरेन्द्रकुमार चौधरी नेतृत्वको टोलीले आज सबै नाकामा पुगेर अवस्थाबारे अनुगमन गर्दै कोरोना संक्रमणको दर उच्चरुपमा बढेकाले जोखिमबाट बच्न उच्च सतर्कता अपनाएको बताउनुभयो । उहाँले यो समयमा सम्पूर्ण नागरिकहरु विशेष सावधानी अपनाएर घरभित्रै बसेर स्वास्थ्य सुरक्षाको ख्याल गर्नुपर्ने भन्दै नाकामा आवत जावत गर्ने मानिसहरुको जाँचको कार्यलाई प्रभावकारी बनाउन स्वास्थ्यकर्मीलाई निर्देशन समेत दिनुभयो ।

यो समयमा कसैलाई पनि केही स्वास्थ्य समस्या देखिएमा तत्काल गाउँपालिकाका स्वास्थ्यकर्मीलाई सम्पर्क गर्न सबैलाई आग्रह गर्दै सम्पूर्ण स्वास्थ्य इकाईहरुमा औषधि तथा स्वास्थ्य सुरक्षाका सामग्रीहरुको राम्रो व्यवस्थापन गरेको बताउनुभयो ।

गाउँपालिकाले सीमा नाकामा आउने मानिसहरुको एन्टिजेन जाँच तथा कोरोनाको लक्षण देखिएका विरामीहरुलाई पिसिआर स्वाब संकलनका लागि बेतहनी स्वास्थ्य चौकीमा रिफर गर्ने गरिएको स्वास्थ्य शाखा संयोजक बुढाले बताउनुभयो ।

अनुगमन टोलीमा अध्यक्ष चौधरीसंगै गाउँपालिका अन्तरगतका विभिन्न स्वास्थ्य चौकी इन्चार्ज लगायतको सहभागिता रहेको थियो । यसैवीच गाउँपालिका अन्तरगत रहेको बाल सुधार केन्द्रमा माग भए बमोजिमको औषधिहरु समेत उपलब्ध गराइएको थियो ।

प्रकाशित मिति: मंगलबार, वैशाख १४, २०७८ १८:४२