बाँके कांग्रेसले भन्यो-'कोरोना विरामीलाई उपचारबाट बञ्चित नगर'

स्थानीय

गृहपृष्ठ
स्थानीय
बाँके कांग्रेसले भन्यो-'कोरोना विरामीलाई उपचारबाट बञ्चित नगर'

बाँके कांग्रेसले भन्यो-'कोरोना विरामीलाई उपचारबाट बञ्चित नगर'

मंगलबार, वैशाख २८, २०७८ बागेश्वरी पोस्ट

नेपालगन्ज । नेपाली कांग्रेस बाँकेले कोरोना संक्रमित बिरामी कसैलाई पनि उपचारबाट बञ्चित नगर्न आग्रह गरेको छ । जिल्ला कोभिड–१९ संकट ब्यवस्थापन केन्द्र बाँकेका संयोजक एवम् बाँकेका प्रमुख जिल्ला अधिकारी शिवराम गेलाललाई आज ध्यानाकर्षण पत्र बुझाउँदै कांग्रेसले यस्तो आग्रह गरेको हो ।

अक्सिजनले धान्न नसकेको भन्दै अस्पतालले बिरामीलाई भर्ना समेत नलिएको भन्ने समाचारहरु सुन्नमा आएको भन्दै कसैलाई पनि स्वास्थ्य उपचारबाट बञ्चित नगर्न र सबै नागरिकका लागि उपचारको सम्पूर्ण प्रबन्ध मिलाउनुपर्ने कांग्रेसको माग छ ।

अस्पतालमा कतिपय कोरोना संक्रमित बिरामीले सहज रुपमा उपचार सेवा पाउन नसकेको, भर्ना हुनका लागि घण्टौं समयसम्म प्रतिक्षा गर्नु परिरहेको, बिरामी भर्नामै पक्षपात हुने गरेको, पहुँच नपुगेका र अस्पतालमा समयमै भर्ना हुन नपाएका बिरामीले ज्यानै गुमाउनु परिरहेको जनगुनासो ब्यापक रुपमा आइरहेकोप्रति गम्भीर ध्यानाकर्षण भएको कांग्रेसले जनाएको छ ।

कोरोना महामारीको निहुँमा नेपालगन्जका अस्पतालमा नन–कोभिड बिरामीले समेत उपचार नपाइरहेको गुनासो आइरहेको अवस्थामा सबै स्वास्थ्य समस्या भएका बिरामीलाई सहज रुपले उपचारको ब्यवस्था मिलाउन पनि अनुरोध गरेको छ । अस्पतालमा अक्सिजन, औषधि, स्वास्थ्यकर्मी र प्राविधिकको दीर्घकालीन ब्यवस्थापन गर्न तथा रेम्डिसिभिर, स्यानीटाइजर, मास्क तथा खाद्यान्न र तरकारीमा कालोबजारी नियन्त्रण गर्न कांग्रेसले आग्रह पनि गरेको छ ।

कोरोना संक्रमित बिरामीको निःशुल्क उपचार ब्यवस्था मिलाउनुका साथै पिसिआर परिक्षणको कामलाई सहज र छिटो, छरितो बनाउन तथा स्थानीय तह (पालिकास्तर)सम्म स्वाब संकलनको ब्यवस्था चाँडो मिलाउन र अक्सिजन, औषधि र दक्ष जनशक्ति सहितको आइसोलेसन स्थापना गर्ने कार्यलाई जोड दिनुपर्ने जनाइएको छ ।

नयाँ भेरियन्टसहित तीब्र रुपमा फैलिरहेको कोरोना भाइरस(कोभिड–१९) को महामारीले बाँकेमा भयावह स्थिति उत्पन्न भइरहेको अवस्थामा दिनहुँ बढिरहेको कोरोना संक्रमण र मृत्युले पार्टीलाई स्तब्ध बनाएको कांग्रेसले उल्लेख गरेको छ । ध्यानाकर्षण पत्र बुझाउँदै जिल्ला सभापति किरण कोइरालाले कोरोना संक्रमितको उपचार, पिसिआर परिक्षणको दायरालाई बढाउन सुझाव दिनुभयो । कोरोना संक्रमितको उपचारका लागि आवश्यकता परेमा कांग्रेस बाँकेले नेपालगन्जस्थित आफ्नो पार्टी कार्यालयलाई आइसालेसन सेन्टर बनाउन दिने उहाँले सुनाउनुभयो ।

‘कोरोना संक्रमणको भयावह अवस्थालाई मध्यनजर गर्दै हामीले बाँके जिल्लालाई स्वास्थ्य आपतकाल घोषणा गर्न यसअघि नै माग गरिसकेका छौं, आफ्नो पार्टी कार्यालयलाई पनि आइसोलेसन सेन्टरको प्रयोग गर्न दिने निर्णय पनि गरेका छौं,’ उहाँले भन्नुभयो । सो क्रममा जिल्ला सचिव तप्त पौडेल, क्षेत्रीय सभापति रमेश गुप्ता, महासमिति सदस्य मेघराज ओली र जिल्ला कार्यसमिति सदस्य सुधान्सु कोइरालाले पनि प्रमुख जिल्ला अधिकारी गेलाललाई कोरोना संक्रमण नियन्त्रणबारे महत्वपूर्ण सुझाव दिनुभएको थियो ।

प्रकाशित मिति: मंगलबार, वैशाख २८, २०७८ २१:१४