कोहलपुरको जागरण पुनःस्थापना केन्द्रमा युवकको मृत्यु, हत्या गरिएको परिवारको दाबी

स्थानीय

गृहपृष्ठ
स्थानीय
कोहलपुरको जागरण पुनःस्थापना केन्द्रमा युवकको मृत्यु, हत्या गरिएको परिवारको दाबी

कोहलपुरको जागरण पुनःस्थापना केन्द्रमा युवकको मृत्यु, हत्या गरिएको परिवारको दाबी

बुधबार, जेठ २६, २०७८ बागेश्वरी पोस्ट

कोहलपुर(बाँके) । कोहलपुरको जागरण पुनःस्थापना केन्द्रमा २१ बर्षका एक युवकको मृत्यु भएपछि मृतकका परिवारले मृत्युलाई 'हत्या' भएको दाबी गरेका छन् ।

दाङको तुलसीपुर बेलुवा घर भई हाल कोहलपुरमा बस्दै आएका कुले ओलीका छोरा टोपबहादुर ओलीको ३ दिन अघि मृत्यु भयो । गत साउन ५ गते छोरालाई पुनःस्थापना केन्द्रमा राखिएको बताउँदै ओलीले भने-'म त सोलुखुम्बुतिर बस्छु, तीन दिन अघि विहान ८ बजेतिर उसकी आमालाई फोन आयो, तपाईंको छोरा विरामी छन्, हामीले नेपालगञ्ज मेडिकल कलेज कोहलपुरमा ल्याएका छौं भनेछन्, त्यसपछि फेरि ५ मिनेटमै अर्को फोन गरेर तपाईंको छोराको मृत्यु भयो भनियो, केही नभएको मान्छेको एक्कासी कसरी मृत्यु भयो', उनले भने-'मेरो एक मात्र छोरो थियो, कुलतमा लागेपछि उसकी आमाले त्यहाँ लगेर राखिदिइन्, अहिले छोराको मृत्यु भयो, हामीले छोरालाई त्यहाँ मार्न पठाएका त होइनौं नि ?'

उनले छोराको शरीरभरि निलडाम भएको बताएका छन् । 'घाँटीदेखि पैतलासम्म चोटै चोट र दाग छ, पैतलामा रगत जमेर निलो भएको छ, कोर्रा र चिर्पटले हानेका धब्बा छन्, अण्डकोष फुटेको छ', मृतकका बुवाले भने । छोराको हत्या गरेर अपराध लुकाउन पुनःस्थापना केन्द्रका सञ्चालकहरुले अनेक प्रपञ्च गरेको आरोप उनको छ । घटनाको सत्यतथ्य छानविन गरेर दोषीलाई कारवाही नहुँदासम्म छोराका लाश नबुझ्ने उनले बताए । घटना जेठ २४ गतेको हो ।

इलाका प्रहरी कार्यालय कोहलपुरका प्रमुख डिएसपी रविन्द्र खनालले बयान र प्रमाण जुटाएर घटनाबारे सुक्ष्म अनुसन्धान गरिरहेको बताए । खनालले उनी बसेको कोठा, उनका साथी, उनीसंग बस्ने पार्टनर, उनको दायाँ बायाँ कोठमा बस्नेहरु तथा पुनःस्थापना केन्द्रका सञ्चालक र कर्मचारीहरुसंग पनि घटनाबारे बुझिरहेको बताए । उनले भेरी अस्पतालमा डाक्टरहरुको एक समूहले लाशको पोष्टमार्टम गरिसकेको जानकारी आएपनि रिपोर्ट आफू कहाँ नआएकाले यसबारे थप भन्न नसकिने बताए ।

'रिपार्ट पाएपछि शंका गर्ने नगर्ने ठाउँ के कस्तो हुन्छ, त्यही अनुसार घटनालाई हेर्छौं', उनले भने । जागरण पुनःस्थापना केन्द्रले भने उनी एकाएक बेहोस भएपछि घरमा जानकारी गराएको, अभिभावकीय भूमिका निभाउँदै उपचारमा लगेर पनि बचाउन नसकेको बयान दिएको डिएसपी खनालले जानकारी दिए । उनीहरुले प्रहरी समक्ष टोपबहादुर बेहोस भएपछि शुरुमा कोहलपुर मेडिकल कलेज लगेको तर नन कोभिड विरामीलाई त्यहाँ भर्ना नगरेपछि भेरी अस्पताल ल्याएपनि बचाउन नसकेको बताएका छन् ।

'सानोमा इन्सेफ्लाइटिस भएकाले मेरो छोरोको हात र खुट्टाको एक साइड अपांग थियो, उ शारिरीक रुपमा केही कमजोर नै थियो तर कुलतमा लागेपछि सुध्रिएला भनेर त्यहाँ पठाएको उनीहरुले उल्टै मारे', उनले आक्रोश पोखे । चरम शारीरिक यातना दिएर आफ्नो छोराको हत्या गरिएको उनको जिकिर छ । मृतकका बुवाले छोरालाई छारे रोगको सामान्य समस्या भएको बताएका छन् । तर, छोरो बेहोस भएर मरेको नभई शरीरमा चोटको प्रकृति र उनीहरुको व्यवहार देख्दा हत्या नै गरिएको उनको दाबी छ ।

प्रकाशित मिति: बुधबार, जेठ २६, २०७८ १६:२९