नेपालगञ्जमा अब गल्र्स कलेज सञ्चालन हुने

स्थानीय

गृहपृष्ठ
स्थानीय
नेपालगञ्जमा अब गल्र्स कलेज सञ्चालन हुने

नेपालगञ्जमा अब गल्र्स कलेज सञ्चालन हुने

सोमबार, असार १४, २०७८ बागेश्वरी पोस्ट

नेपालगञ्ज । नेपालगञ्ज उपमहानगरपालिकाले लामो समयदेखि तयारी गरिरहेको गल्र्स कलेज नयाँ शैक्षिक सत्रदेखि सुरु हुने भएको छ ।

नेपालगञ्ज उपमहानगरपालिकाका नगर प्रमुख डा. धवल शम्शेर राणा नेतृत्वको टोलीले सम्बन्धन लगायतका विषयमा आइतबार मध्यपश्चिम विश्वविद्यालयका उपकुलपति नन्दवहादुर सिंह लगायतका उच्च पदाधिकारीसँग छलफल गरेर फर्किएको छ । मध्यपश्चिम विश्वविद्यालयका उपकुलपतिसँग छलफलपछि नेपालगञ्ज फर्किएको टोली आज पनि नगरप्रमुख डा.धवलशम्शेर राणा सहितको छलफलमा छ । कलेज सञ्चालनका लागि असार १० गते भएको ९औं नगरसभाबाट विनियमावली पारित गरिएको शिक्षा शाखा प्रमुख गोर्खवहादुर थापाले जानकारी दिनुभयो ।

पहिलो वर्ष बिएससी सिएसआइटी र विएड कक्षा सञ्चालनका लागि अनुमतिको प्रक्रिया सुरु गर्दै प्रस्तावना तयार पारी सम्बन्धनका लागि केही दिनमै औपचारिक प्रस्ताव विश्वविद्यालयमा पेश गरिने शाखा प्रमुख थापाले बताउनुभयो ।

नेपालगञ्जमा रहेका मधेसी र मुस्लिम समुदायका छात्राहरुका लागि मुख्य लक्षित गरी कलेज स्थापना गर्न लागिएको हो । कलेज सञ्चालनका लागि निर्माण भइरहेको भवनको सम्पूर्ण कार्य एक महिनाभित्रै सम्पन्न हुने उपमहानगरपालिकाले जनाएको छ । नगर प्रमुख राणाले नेपालगञ्जमा कन्या क्याम्पसको आवश्यकता महसुश गरी सुवातदेखि नै कलेज स्थापनाको पहल गरिएको र अहिले त्यो पूरा हुने चरणमा पुगेको बताउनुभयो ।

प्रकाशित मिति: सोमबार, असार १४, २०७८ १४:३०