नेपालगञ्जको भाटभटेनीमा गुणस्तरहिन बेकरी आइटम !

स्थानीय

गृहपृष्ठ
स्थानीय
नेपालगञ्जको भाटभटेनीमा गुणस्तरहिन बेकरी आइटम !

नेपालगञ्जको भाटभटेनीमा गुणस्तरहिन बेकरी आइटम !

बुधबार, असोज १३, २०७८ बागेश्वरी पोस्ट

फाइल फोटो

नेपालगञ्ज । नेपालगञ्जमा अवैधरुपमा सञ्चालित एक बेकरी उद्योगले गुणस्तरहिन बेकरी उत्पादन गरी विक्रि गर्ने गरेको पाइएको छ । म्याद गुज्रेका कच्चा पदार्थ प्रयोग गरी बेकरी तयार गर्ने गरिएको अनुगमनका क्रममा पाइएको हो । उपभोक्ता हित संरक्षण समिति बाँकेले गरेको संयुक्त बजार अनुगमनका क्रममा अबैधरुपले सञ्चालित बेकरी उद्योगबाट ठूलो मात्रामा म्याद गुज्रेको कच्चा पदार्थ बरामद गरेको हो ।

नेपालगञ्ज–१८ सुर्खेतरोडमा अपरक्राष्ट प्रालि चुच्चेपाटी काठमाण्डौको नामले सञ्चालनमा रहेको बेकरी उद्योगबाट म्याद गुज्रेका बेकरी उत्पादन गर्ने कच्चा पदार्थ भेटिएको हो। अनुगमन टोलीमा रहेका जिल्ला प्रशासन कार्यालय बाँकेका अधिकृत हरिश्चन्द्र शर्माले बेकरी उद्योगलाई आवश्यक पर्ने कच्चा पदार्थ काठमाण्डौबाट ल्याइएको र सबैको म्याद गुज्रेको अवस्थामा भेटिएको बताए । नेपालगञ्ज सुर्खेतरोडमा नेपाल टेलिकमको क्षेत्रीय कार्यालय अगाडिको घरमा उद्योगको कुनै पनि बोर्ड नराखी सञ्चालन गरेको अवस्थामा अनुगमनको क्रममा भेटिएको हो ।

खाद्य प्रविधि तथा गुण नियन्त्रण कार्यालय बाँकेका खाद्य अनुसन्धान अधिकृत विवेक कुमार सुवेदीले बजार अनुगमनका क्रममा नेपालगञ्ज बजारका केही होटल तथा सपिङ मलमा यस उद्योगको उत्पादनहरुमा उत्पादन मिति, म्याद समाप्त हुने मिति उल्लेख नभएको अवस्थामा पाइएकोले खोजी गर्दै जाँदा सुर्खेतरोडमा उद्योगको कुनै बोर्ड नराखी, खाद्य अनुज्ञापत्र समेत नलिएर सञ्चालनमा रहेको अवस्थामा गोदाम भरी म्याद गुज्रेका बेकरी उत्पादन गर्न आवश्यक पर्ने कच्चा पदार्थ भेटिएपछि नियन्त्रणमा लिएर अनुसन्धान सुरु गरेको बताए ।

अपरक्रष्ट प्रालिका नेपालगञ्ज शाखाका प्रबन्धक विपुल बमले भने कारखानामा सप्लायर्सले भूलबस म्याद गुज्रेको कच्चा पदार्थ पठाएकाले आफूहरुले सबै सामान फिर्ता पठाउने तयरी गर्दैगर्दा संयुक्त अनुगमन समितिले भेट्टाएको दाबी गरे । उद्योगले म्याद गुज्रेको कच्चा पदार्थ प्रयोग गरी बेकरी उत्पादन नगरेको उनले दाबी गरे ।

त्यस बेकरी उद्योगबाट उत्पादन हुने बेकरी आइटम नेपालगञ्जको भाटभटेनी सुपर मार्केटमा विक्रि वितरण हुँदै आएको थियो । सो उद्योगलाई उपभोक्ता हित विपरित सञ्चानल गरेको अभियोगमा २ लाख जरिवाना गरिएको छ । बरामद गरिएको ब्रेड, पाउरोटी, केक, डुनट र म्याद गुज्रेको अवस्थाका कच्चा पदार्थ गरी २ लाख २२ हजार ६७ रुपैयाँ बराबरको सामाग्री मुचुल्का तयार गरी नष्ट गरिएको छ ।

प्रकाशित मिति: बुधबार, असोज १३, २०७८ १६:५७

प्रतिक्रिया दिनुहोस्