आज पनि जमुनाहा पुुगे एसपी, भारतबाट फर्किनेलाई सहज

सुरक्षा-अपराध

गृहपृष्ठ
सुरक्षा-अपराध
आज पनि जमुनाहा पुुगे एसपी, भारतबाट फर्किनेलाई सहज

आज पनि जमुनाहा पुुगे एसपी, भारतबाट फर्किनेलाई सहज

बिहीबार, असोज १४, २०७८ बागेश्वरी पोस्ट

नेपालगन्ज । बाँके प्रहरी प्रमुख एसपी श्यामकृष्ण अधिकारीले आज विहान पनि जमुनाहा नाकाको निरिक्षण गरेका छन् । हिजो जस्तै आज पनि जमुनाहा नाका पुगेका एसपी अधिकारीले आजको त्यहाँको वातावरण भने शान्त पाएको बताएका छन् । उनका अनुसार रिक्सा र गाडीका स्टाफहरु शान्त भएका छन् ।

उनले भने-"जमुनाहामा सुरक्षाकर्मीहरुले आज राम्रो काम गरेका छन्, भीड ब्यबस्थापन गरिरहेका छन्, रोजगारी गरेर भारतबाट चाडपर्व मनाउन आउने नेपालीलाई सहज तरिकाले कोरोना परिक्षण गर्दै नेपालगञ्ज पठाइएको छ ।" भारतबाट धेरैको संख्यामा एकैपटक नेपालीहरु आउने भएकाले नेपालगञ्ज उपमहानगरपालिकासंग समन्वय गरेर कोरोना परिक्षण गर्ने अन्य कक्ष पनि बनाउन बनाउन पहल गर्ने एसपी अधिकारीले बताए । त्यहाँबाट आउने नेपालीलाई कोही दलालले जर्बजस्ती आफ्नो बसमा राखेको देखिएमा तत्काल पक्राउ गर्न निर्देशन दिएको पनि एसपी अधिकारीले बताए । डिएसपी मधुसुदन न्यौपाने पनि एसपीसंगै निरिक्षणमा गएका थिए ।

सवारी साधनहरुलाई तल्लो भन्सार कार्यालय भन्दा तल आउन दिइएको छैन । यात्रुहरु पनि आफूले चाहेको सवारी साधनमा बसेको पाइएको छ । जमुनाहामा सुरक्षा व्यवस्था कडा पारिएको छ । प्रहरी प्रमुख नै सीमा नाकामा गएर नेपाल फर्किने यात्रुहरुसंग आफैं सम्पर्क गरी चासो दिएपछि उनीहरु खुसी भएका छन् । भारतबाट फर्केका नेपालीहरुले रुपैडिहाको बसपार्कमा केही दलालहरुले पैसा मागेको बताएपनि भारतीय सुरक्षाकर्मीहरुले दुःख नदिएको बताए ।

सिम्लाबाट फर्केका कालिकोट घर भएका अर्जुन बुढाले एसपी जस्तो मान्छे सीमामा आएर आफ्ना दुःख पीडा बुझ्दा अत्यन्त खुसी लागेको बताए। प्रहरीले सीमामा यसरी नै कडाई गरे भारतबाट फर्किने नेपालीहरु नलुटिने बुढाले बताए । जमुनाहा प्रहरी इन्चार्ज प्रहरी नायब निरिक्षक पूर्ण खत्रीले दैनिक रोजगारी गरेर भारतबाट फर्किनेको संख्या २ हजारको हराहारीमा भएको बताए । खत्रीले संख्या धेरै भएकाले प्रहरीलाई भीड ब्यबस्थापनमा केही कठिनाई भएको बताए ।

बुधबार पनि एसपी अधिकारी र डिएसपी न्यौपानेले कडा छड्के जाँच गरेका थिए । त्यहाँ प्रहरीको कार्य चित्त नबुझ्दो पाएपछि एकै पटक डेढ दर्जन प्रहरीलाई एसपी अधिकारीले जिल्ला तानेका थिए । एसपी अधिकारीले प्रहरीले गलत कार्य गरे र फर्किने नेपालीले दुःख पाएको खबर आए आफूलाई त्यो सैह्य नहुने बताएका छन् ।

प्रकाशित मिति: बिहीबार, असोज १४, २०७८ १२:५०

प्रतिक्रिया दिनुहोस्