कृषि अनुसन्धान खजुरामा बीउ प्रशोधन प्लान्ट उद्घाटन

स्थानीय

गृहपृष्ठ
स्थानीय
कृषि अनुसन्धान खजुरामा बीउ प्रशोधन प्लान्ट उद्घाटन

कृषि अनुसन्धान खजुरामा बीउ प्रशोधन प्लान्ट उद्घाटन

बिहीबार, असोज १४, २०७८ बागेश्वरी पोस्ट

खजुरा(बाँके) । कृषि अनुसन्धान निर्देशनालय खजुराले बीउ प्रशोधन प्लान्टको शुभारम्भ गरेको छ । नेपाल कृषि अनुसन्धान परिषद्, बाली तथा बागवानी अनुसन्धानका निर्देशक राम बहादुर केसीले बीउ प्रशोधन प्लान्टको उद्घाटन गरे । निर्देशनालयले आज एक कार्यक्रमको आयोजना गर्दै बीउ प्रशोधन प्लान्टको उद्घाटन गरेको हो ।

केही बर्ष अघि निर्माण सम्पन्न भएको भवनमा बीउ प्रशोधन प्लान्ट जडान गरिएपछि यसको शुभारम्भ गरिएको निर्देशनालयले जनाएको छ । ५० लाख ४० हजार बढीको लगानी लागेको उक्त प्रशोधन प्लान्टले अनुसन्धानमा उत्पादन हुने धान, गहुँ जस्ता बीउहरुलाई थप गुणस्तरीय बनाउन टेवा पुग्नेछ । औसतमा प्रति घण्टा एक टन बीउ प्रशोधन गर्ने क्षमता रहेको कृषि अनुसन्धान निर्देशनालय खजुराका प्राविधिक अधिकृत तथा सुचना अधिकारी रविन गिरीले जानकारी दिए ।

कृषि अनुसन्धान निर्देशनालय लुम्बिनी प्रदेश बाँके खजुराका निर्देशक अमर बहादुर पुनको अध्यक्षतामा भएको उद्घाटन कार्यक्रममा बाली तथा बागवानी अनुसन्धानका निर्देशक केसीले अनुसन्धानका गतिविधिका बारेमा किसानलाई जानकारी हुनपर्नेमा जोड दिए । कृषि अनुसन्धानले विकास गरेका विभिन्न जातहरु किसानले चासो लिएर लगाउन सके उत्पादन बढाउन सकिने उनले उल्लेख गरे । उनले बीउ प्रशोधन प्लान्ट निर्माण भएपछि गुणस्तरीय विउ किसान माझमा पुग्न समस्या नहुने उल्लेख गरे ।

कृषि अनुसन्धान निर्देशनालय खजुराका निर्देशक पुनले अनुसन्धानका कार्यक्रमलाई किसानसंग जोडेर किसानलाई जानकारी गराउने उद्देश्य रहेको बताए । उनले अनुसन्धानले गरेका कामबाट नजिकका किसानले समेत फाइदा लिन नसकेको बताउँदै यसतर्फ किसानले पनि चासो दिनुपर्नेमा जोड दिए । अनुसन्धानले गरेका कामको बारेमा जानकारी लिन किसानहरुलाई निर्देशनालयमा आउन पुनले आग्रह गरे । किसानहरुलाई कृषि अनुसन्धान निर्देशनालयमा पालैपालो सिकाई गर्न पठाउन समेत उनले पालिकाहरुलाई अनुरोध गरे । एग्री इन्जिनियर सागर महर्जनले मेसिनहरुले गर्ने कामका बारेमा उपस्थित किसान तथा सरोकारवालाहरुलाई जानकारी गराए ।

कार्यक्रममा किसानहरुले पनि निर्देशनालयले गरेको कामका बारेमा चासो व्यक्त गरेका थिए । कृषि अनुसन्धान निर्देशनालयले आफ्ना गतिविधिहरु बाहिर ल्याउन वेबसाइट पनि निर्माण गरेको छ । उक्त वेबसाइटको पनि निर्देशक केसीले सोही कार्यक्रममा उद्घाटन गरे । कृषि अनुसन्धानको वेबसाइट यस्तो रहेको छ- www.doarkhajura.narc.gov.np

प्रकाशित मिति: बिहीबार, असोज १४, २०७८ १५:५५

प्रतिक्रिया दिनुहोस्