कृषि अनुसन्धान खजुरामा कृषक दिवस मनाइयो

स्थानीय

गृहपृष्ठ
स्थानीय
कृषि अनुसन्धान खजुरामा कृषक दिवस मनाइयो

कृषि अनुसन्धान खजुरामा कृषक दिवस मनाइयो

बिहीबार, असोज १४, २०७८ बागेश्वरी पोस्ट

खजुरा(बाँके) । कृषि अनुसन्धान निर्देशनालय खजुरा बाँकेले धान बाली विशेष कृषक दिवस मनाएको छ । हरेक वर्ष सिजन अनुसार मनाउने गरेको अनुसन्धानले धान बाली विशेष कृषक दिवस मनाएको हो । कृषि अनसन्धान निर्देशनालय खजुराका निर्देशक अमर बहादुर पुनको अध्यक्षतामा भएको दिवस मनाउने कार्यक्रममा निर्देशनालय नजिकै रहेका जिल्लाका किसानहरुलाई बोलाएर धानका विभिन्न जात तथा विशेषताको बारेमा जानकारी गराइएको छ ।

धान बाली विशेष कृषक दिवसका प्रमुख अतिथि नेपाल कृषि अनुसन्धान परिषद्का बाली तथा बागवानी अनुसन्धान निर्देशक राम बहादुर केसीले हाससम्म नेपालमा १४४ जातका धान सूचीकृत भएकोमा २० प्रतिशत जातका धान मात्रै किसान माझमा पुगेको उल्लेख गरे । निर्देशक केसीले राम्रो जातका धान किसान माझमा पुग्न आवश्यक रहेको बताए । उनले किसान र बैज्ञानिक बीचको सम्बन्ध गाढा हुनुपर्नेमा जोड दिए । धान विशेष कृषक दिवसमा किसानलाई कृषि अनुसन्धान निर्देशनालय क्षेत्रमा प्रत्यक्ष अवलोकन गराई धानको बारेमा आवश्यक जानकारी गराइएको थियो ।

किसानहरुलाई निर्देशनालयभित्र हुने गरेका अन्य अनुसन्धानका गतिविधिहरु समेतको जानकारी र अवलोकन गराइएको निर्देशनालयका सूचना अधिकारी रविन गिरीले जानकारी दिए । कृषक दिवस मनाउने कार्यक्रममा कृषि व्यवसाय प्रर्वद्र्धन सहयोग तथा तालिम केन्द्रका निमित्त प्रमुख अमरराज शर्मा घिमिरेले कृषक र वैज्ञानिक बीचको भेटले कृषि अनुसन्धानका बारेमा जानकारी दिन सहज बनाएको बताए । कृषि वैज्ञानिकले गरेको अनुसन्धानका कार्यक्रम किसान माझमा पु¥याउन आवश्यक रहेको उनले बताए । उनले कृषि अनुसन्धानका कुरा किसानलाई जानकारी गराउन कृषक र वैज्ञानिक बीचको भेट गर्ने कार्यक्रम स्थानीय तहले पनि गर्नुपर्नेमा जोड दिए ।

कोसेबाली अनुसन्धान कार्यक्रम खजुराका संयोजक डा. राजेन्द्र दराईले धानबालीमा भएका अधिकांश जातहरु किसानले थाहा पाउन नसकेको बताए । किसानको रोजाईमा परेका जातहरुलाई अनुसन्धान गरेर रोग किरा सहन सक्ने, नसक्ने पत्ता लगाउन सकिने दराईले बताए । उनले धानको उत्पादनसँगै बजारको बारेमा समेत सोच्न आवश्यक रहेको उल्लेख गरे ।

किसानहरुलाई अनुसन्धानका फिल्ड अवलोकन तथा विभिन्न परिक्षण बारेमा जानकारी कृषि अनुसन्धान निर्देशनालय खजुराका बैज्ञानिक एस १ रामदास चौधरी, बैज्ञानिक एस १ डा.राम बहादुर खड्का, प्राविधिक अधिकृत वशिष्ठ आचार्य, प्राविधिक सहायक झरना उपाध्यायले गराएका थिए ।