अफगानी भित्रिन सक्ने भन्दै सादा पोशाकमा खटिए जमुनाहा प्रहरी इन्चार्ज

सुरक्षा-अपराध

गृहपृष्ठ
सुरक्षा-अपराध
अफगानी भित्रिन सक्ने भन्दै सादा पोशाकमा खटिए जमुनाहा प्रहरी इन्चार्ज

अफगानी भित्रिन सक्ने भन्दै सादा पोशाकमा खटिए जमुनाहा प्रहरी इन्चार्ज

बिहीबार, कात्तिक १८, २०७८ बागेश्वरी पोस्ट

नेपालगन्ज । नेपालगन्जको मुख्य सीमा नाका जमुनाहामा निकै कडाई गरिएको छ ।

अवैध सामाग्रीको ओसारपसार र अफगानी नागरिक नेपाल भित्रिन सक्ने भन्दै इलाका प्रहरी कार्यालय जमुनाहाले नाकामा भारतबाट नेपालगन्ज भित्रिरहेका ब्यक्तिहरुमाथि निगरानी बढाउँदै सोधपुछ गर्दै आएको छ ।

अफगानिस्तानमा तालिवानले सरकार हातमा लिएपछि अफगानी नागरिकहरु त्यहाँबाट शरणार्थीको रुपमा नेपाल भित्रिन सक्ने हुँदा जमुनाहा प्रहरीका प्रमुख प्रहरी नायब निरीक्षक मीन बहादुर बिष्ट आजभोलि सादा पोशाकमा खटिएर भारतबाट सामान ढुवानी गरी आएका ठूला ट्रकमा आफैं चढेर चेकजाँच गर्दै आएका छन् ।

प्रहरी नायब निरीक्षक बिष्टले ट्रकमै चढेर त्यहाँ रहेका चालक तथा अन्य ब्यक्तिहरुको परिचयपत्र जाँच गर्दै आएका छन् । नायब निरीक्षक बिष्टले साना गाडीमा आएका ब्यक्तिहरुको समेत सोधपुछ गदै आएका छन् ।

"अफगानी नागरिकलाई नेपाल प्रवेश गर्न नदिनु भन्ने माथिल्लो आदेशको पालना गर्दै कहिले चेकपोष्ट त कहिले दशगजामै गएर सादा पोशाकमा बसेर कडा जाँच गर्दै आएको छु," नायब निरीक्षक बिष्टले भने ।

उनी भन्छन्-"जमुनाहा नाकाबाट अफगानी नागरिकलाई प्रवेश गर्न नदिने नै मुख्य बिषय हो। धेरै जसो प्रहरीलाई सादा पोशाकमा खटाएर अफगानी नागरिकको मुभमेन्ट रोक्न रातदिन लागि परेको छु ।"

दिपावलीको समयमा रुपईडिहाबाट ल्याइएका लाखौंका पटाका समेत बरामद गरी नष्ट गरिएको बिष्टले बताए । "भन्सार छलीका सामाग्री ओसारपसार गर्न नदिने, त्यहाँको शान्ति सुरक्षा चुस्त पार्ने र अहिले पटाका ल्याउनबाट रोक्ने हाम्रो मुख्य उद्देश्य हो," बिष्टले भने । त्यसका साथै देशमा अवैधरुपमा आउने अफगानी नागरिकलाई प्रवेशमा रोक लगाउनु अहिलेको समसामयिक कुरा रहेको नायब निरीक्षक बिष्टले बताए ।

त्यस्तै जमुनाहा नाकामा तैनाथ रहेको सशस्त्र प्रहरीले पनि अवैध सामाग्री ओसारपसार गर्न नदिन चनाखो भएर बसेको छ । सशस्त्र प्रहरीले भारतबाट ल्याइने हरेक सामाग्री चेकजाँच गर्दै भन्सार गराउँदै आएको छ । त्यहाँ रहेको सशस्त्र प्रहरीले पनि अफगानी नागरिकलाई प्रवेश गर्न नदिन उच्च सुरक्षा सतर्कता अपनाएको छ ।