साक्षर नेपालगञ्ज घोषणाका लागि विशेष अभियान

स्थानीय

गृहपृष्ठ
स्थानीय
साक्षर नेपालगञ्ज घोषणाका लागि विशेष अभियान

साक्षर नेपालगञ्ज घोषणाका लागि विशेष अभियान

बिहीबार, पुस १, २०७८ बागेश्वरी पोस्ट

नेपालगञ्ज । नेपालगञ्जलाई साक्षर नगर घोषणाका लागि विशेष अभियान सञ्चालन भएको छ । नेपालगञ्ज उपमहानगरपालिकाले बिहिवार पत्रकार सम्मेलन गरी फागुन अन्त्यसम्म साक्षरता अभियान सञ्चालन गरेर फागुन मसान्तमा नेपालगञ्जलाई साक्षर नगर घोषणा गर्न लागिएको जनाएको छ ।

उपमहानगरपालिकाका प्रमुख प्रशासकीय अधिकृत गुरुदत्त सुवेदीले अबको एक साता निरक्षरहरुको तथ्यांक संकलन गरी ४५ दिने साक्षरता कक्षा सञ्चालन गरिने बताए । साक्षरता कक्षा सञ्चालनका लागि नगरभित्रका वाल विकास शिक्षकलाई परिचालन गरिने भएको छ । वाल विकास शिक्षकहरुलाई उपमहानगरपालिकाले साक्षरता कक्षा सञ्चालनका लागि आवश्यक सहजीकरण गरेको जानकारी दिँदै प्रमुख प्रशासकीय अधिकृत सुवेदीले साक्षरता अभियान निरन्तर सञ्चालनका लागि समेत पहल गर्ने बताए । नेपालगञ्जमा १५ देखि ६० वर्ष उमेर समूहका हाल करिब १५ हजार निरक्षर रहेको अनुमान छ । उनीहरुलाई विशेष साक्षरता कक्षा सञ्चालन गरी सूचक पूरा गरेर साक्षर नगर घोषणा गर्ने तयारी गरिएको सुवेदीले बताए ।

उपमहानगरपालिकाका शिक्षा अधिकृत भिमवहादुर बुढाले साक्षर उपमहानगरपालिका घोषणाका लागि आवश्यक कार्ययोजना बनाएर अघि बढ्न लागिएको बताउँदै आम नगरबासी लगायत सबै पक्षको साथ र सहयोगको अपेक्षा गरिएको बताए । साक्षर नगरसँगै वाल विवाहमुक्त नगर घोषणा अभियान पनि सँगसँगै लैजान लागिएको उपमहानगरपालिकाले जनाएको छ ।

प्रकाशित मिति: बिहीबार, पुस १, २०७८ २०:०३