नेपालगञ्ज उपमहानगरपालिकालाई जेष्ठ नागरिकमैत्री बनाइने

स्थानीय

गृहपृष्ठ
स्थानीय
नेपालगञ्ज उपमहानगरपालिकालाई जेष्ठ नागरिकमैत्री बनाइने

नेपालगञ्ज उपमहानगरपालिकालाई जेष्ठ नागरिकमैत्री बनाइने

सोमबार, पुस १२, २०७८ बागेश्वरी पोस्ट

नेपालगञ्ज । नेपालगञ्ज उपमहानगरपालिकालाई जेष्ठ नागरिकमैत्री बनाइने भएको छ । त्यसका लागि जेष्ठ नागरिक क्लव तथा क्लव सञ्जाल गठनका लागि कार्यविधि मस्यौदा निर्माण भईरहेको छ । मस्यौदामाथि सुझाव संकलनको काम समेत सुरु भएको छ ।

प्रथम राष्ट्रिय जेष्ठ नागरिक दिवसको अवसर पारेर उपमहानगरपालिकाले आयोजना गरेको शुभकामना आदानप्रदान कार्यक्रम तथा सुझाव संकलन कार्यक्रमबाट वडा नम्बर २ का वडा अध्यक्ष सुनिलसिंह हमालको संयोजकत्वमा जेष्ठ नागरिकका प्रतिनिधि सम्मिलित मस्यौदा तयारी कार्यदल गठन गरिएको छ । नेपालगञ्ज उपमहानगरपालिकाका प्रमुख डा. धवल शम्शेर राणाले जेष्ठ नागरिकको सवालमा उपमहानगरपालिका सधैं गम्भिर रहेको बताउँदै जेष्ठ नागरिकले उठाएका माग सम्बोधन गर्न तयार रहेको बताए ।

उपप्रमुख उमा थापा मगरले नेपालगञ्जलाई जेष्ठ नागरिक नगर बनाउन काम थालिएको बताइन् । उपमहानगरपालिकाले जेष्ठ नागरिकको सेवा सुविधा लगायतका विषयमा नीतिगत निर्णय गर्न थालेको जानकारी दिदै उनले भविष्यमा यसको सकारात्मक प्रतिफल प्राप्त हुने बताइन् । उनले जेष्ठ नागरिकले समाजका लागि महत्वपूर्ण योगदान दिएको भन्दै उनीहरुको सेवा सुविधाका लागि कुनै कसर बाँकी नराख्ने स्पष्ट पारिन् ।

नेपालगञ्ज उपमहानगरपालिकाका महिला वालवालिका तथा जेष्ठ नागरिक महाशाखा प्रमुख शोभा शाहले जेष्ठ नागरिकले पाउनुपर्ने सेवा सुविधाका लागि नीतिगत निर्णय गर्ने, भेरी सम्वद्ध सरोकारवालाहरुसँग अन्तरक्रिया गर्ने, भेरी अस्पतालमा जेष्ठ नागरिक वार्ड स्थापना गर्ने, जेष्ठ नागरिकहरुको विशेषज्ञ समूह गठन गरी स्थानीय तहले उपयोग गर्न सक्ने लगायतका विषयमा छलफलमा उठेको बताइन् ।

नेपालगञ्ज उपमहानगरपालिकामा वडास्तरमा जेष्ठ नागरिक क्लव गठन भई क्रियाशील रहेका छन् ।

प्रकाशित मिति: सोमबार, पुस १२, २०७८ ०८:३९

प्रतिक्रिया दिनुहोस्