कैदी फरार काण्डमा मुछिएका घोराहीका जेलर र सबै प्रहरी कर्मचारी तानिए

सुरक्षा-अपराध

गृहपृष्ठ
सुरक्षा-अपराध
कैदी फरार काण्डमा मुछिएका घोराहीका जेलर र सबै प्रहरी कर्मचारी तानिए

कैदी फरार काण्डमा मुछिएका घोराहीका जेलर र सबै प्रहरी कर्मचारी तानिए

सोमबार, पुस १२, २०७८ बागेश्वरी पोस्ट

नेपालगन्ज । दाङको घोराही कारागारका नाइके जयराज परियार प्रहरीको मोटरसाइकल लिएर फरार भएको घटनामा कारागारका जेलर युवराज परियार र कारागार सुरक्षा प्रमुख प्रहरी सहायक निरीक्षक रुद्रबहादुर सेन ठकुरी तानिएका छन् । जेलर परियारलाई जिल्ला प्रशासन कार्यालय दाङ र प्रहरी सहायक निरीक्षक सेन ठकुरीलाई जिल्ला प्रहरी कार्यालय तानिएको छ । उनीसहित कारागारमा खटिएका सबै प्रहरीहरुलाई अनुसन्धानका लागि जिल्ला प्रहरी तानिएको छ ।

कर्तव्य ज्यान मुद्दामा जन्मकैद सजाय भोगिरहेका नाइके परियारलाई बहाना बनाएर उपचारका लागि भन्दै कारागारबाट निकालेर मिलेमतोमा भगाएको जिल्ला प्रहरी दाङको निष्कर्ष छ ।

दाङका प्रमुख जिल्ला अधिकारी हिरालाल रेग्मीले जानकारी दिए अनुसार तानिएका सबै कर्मचारीहरुको अनुसन्धान भइरहेको छ ।

नाइके परियारलाई छाला सम्बन्धि उपचार गर्न भनेर प्रहरी जवान धनबहादुर चौधरीले गत बुधबार बिहान ११ बजे लु ३४ प ४१० नम्बरको मोटरसाइकलमा अस्पतालतर्फ लिएर गएका थिए ।

प्रहरीका अनुसार उनीहरु दुबै जना अस्पताल नगई घोराहीकै थकाली होटलमा दुई जना महिलासहित पुगेको र त्यहीँबाट परियारलाई भगाएको जिल्ला प्रहरी दाङले जानकारी दिएको छ । घटनामा संलग्न भएका ती दुुई महिला र होटल सञ्चालकलाई प्रहरीले नियन्त्रणमा लिएको जनाएको छ ।

फरार नाइके परियारले प्रयोग गरेको लु ३४ प ४१० नम्बरको मोटरसाइकल लमही ६ बेलदमारको जंगलमा बिहिबार फेला परेको थियो । तर, फरार नाके परियार भने अझै प्रहरीले फेला पार्न सकेको छैन । परियारको खोजतलासका लागि जिल्ला प्रहरी कार्यालय दाङका प्रहरी नायब उपरीक्षक मुकुन्दप्रसाद रिजालको कमाण्डमा प्रहरी टोली परिचालन गरेको जिल्ला प्रहरी दाङले जानकारी दिएको छ ।

प्रकाशित मिति: सोमबार, पुस १२, २०७८ १२:११