नेपालगञ्जका ७ वटा वडा एकसाथ बाल बिवाहमुक्त घोषणा

स्थानीय

गृहपृष्ठ
स्थानीय
नेपालगञ्जका ७ वटा वडा एकसाथ बाल बिवाहमुक्त घोषणा

नेपालगञ्जका ७ वटा वडा एकसाथ बाल बिवाहमुक्त घोषणा

नेपालगञ्जमा बाल विवाहमुक्त वडा ११ पुगे

आइतबार, पुस १८, २०७८ बागेश्वरी पोस्ट

नेपालगञ्ज । नेपालगञ्ज उपमहानगरपालिकाका थप ७ वटा वडालाई बालबिवाह मुक्त वडा घोषणा गरिएको छ । आइतबार औपचारिक कार्यक्रम गरी एकसाथ वडा नम्बर ३,४,९,११,१८,२० र २१ लाई वाल विवाह मुक्त वडा घोषणा गरिएको प्रमुख प्रशासकीय अधिकृत गुरुदत्त सुवेदीले जानकारी दिए ।

जिल्ला समन्वय समिति बाँकेका संयोजक अजय कुमार श्रीवास्तव, बाँकेका प्रमुख जिल्ला अधिकारी सूर्य बहादुर खत्री, शिक्षा विकास तथा समन्वय इकाईका प्रमुख रामसुरेश यादव लगायतको उपस्थितिमा आयोजित कार्यक्रममा नेपालगञ्ज उपमहानगरपालिकाका उपप्रमुख उमा थापा मगरले वडालाई बालविवाहमुक्त वडा घोषणा गरिन् ।

सो अवसरमा उपप्रमुख थापाले यो घोषणापछि महिला र बालिकाको स्वास्थ्यसँगै समृद्ध र सुखी नेपालगञ्ज बनाउन मद्दत पुग्ने बताइन् । घोषणा अन्तिम नहुने भन्दै उनले बाल बिवाहलाई शुन्यमा झार्न सम्पूर्ण नगरबासीको साथ र सहयोगको अपेक्षा गरिएको बताइन् । जिल्ला समन्वय समिति बाँकेका संयोजक श्रीवास्तवले फागुन मसान्तभित्र बाल विवाह मुक्त घोषणा गर्ने स्थानीय तहलाई बैठक भत्ता र प्रशासनिक खर्च कटाएर समन्वय समितिले १० लाख रुपैयाँ प्रोत्साहन बापत् उपलब्ध गराउने बताए ।

प्रमुख जिल्ला अधिकारी खत्रीले घोषणाको पूर्ण कार्यान्वयनमा जनप्रतिनिधि, कर्मचारी र स्थानीय अगुवाको निरन्तर ध्यान रहनुपर्ने सुझाव दिए । नेपालगञ्ज उपमहानगरपालिकाका प्रमुख प्रशासकीय अधिकृत सुवेदीका अनुसार यसअघि नेपालगञ्जका चार वडा बाल विवाहमुक्त घोषणा भइसकेका छन् । उनले नगरका २३ वडा मध्ये बाँकी रहेका वडामा सर्बेक्षण सकेर विभिन्न सचेतनामूलक अभियानपछि छिट्टै बाल विवाहमुक्त नगर घोषणाको तयारी गरिएको जानकारी दिए ।

कार्यक्रममा वडा नम्बर ३ का अध्यक्ष मो. अयुव सिद्धिकी, वडा नम्बर ४ का अध्यक्ष मो. सफिक वेहना, वडा नम्बर ९ का कार्यबाहक अध्यक्ष सिमा केसी, वडा नम्बर २० का वडा अध्यक्ष कृष्ण कार्की, वडा नम्बर २१ का वडा अध्यक्ष रञ्जित खाँ लगायतका जनप्रतिनिधिलाई बाल विवाहमुक्त वडा घोषणा भएको प्रमाणपत्र हस्तान्तरण गरिएको छ ।

प्रकाशित मिति: आइतबार, पुस १८, २०७८ १५:२३