नरैनापुर गाउँपालिकाले बाँड्न थाल्यो ग्याँस सिलिण्डर र चुलो

स्थानीय

गृहपृष्ठ
स्थानीय
नरैनापुर गाउँपालिकाले बाँड्न थाल्यो ग्याँस सिलिण्डर र चुलो

नरैनापुर गाउँपालिकाले बाँड्न थाल्यो ग्याँस सिलिण्डर र चुलो

९५०० घरधुरीलाई बाँडिने

आइतबार, पुस १८, २०७८ बागेश्वरी पोस्ट

नरैनापुर(बाँके) । बाँकेको नरैनापुर गाउँपालिकाले आजदेखि ग्याँस सिलिण्डर र चुलो वितरण गर्न सुरु गरेको छ । नौ बुँदे प्रतिवद्धतासहित डिजिटल प्रविधिबाट ग्याँस सिलिण्डर र चुलो वितरण गर्न सुरु गरिएको गाउँपालिकाले जनाएको छ ।

एक महिनाभित्र पालिकाका सबै घरधुरीलाई ग्याँस सिलिण्डर र चुलो वितरण गरिसक्ने गाउँपालिकाका अध्यक्ष इस्तियाक अहमद शाहले जानकारी दिए । नरैनापुर गाउँपालिकाले ५ करोड रकम खर्चेर पालिकाभित्रका ९ हजार ५ सय घरधुरीलाई ग्याँस सिलिण्डर र चुलो वितरण गर्न सुरु गरेको जनाएको छ । वनजंगल फडानी गर्ने कार्य रोकेर वातावरण संरक्षणमा योगदान पुर्याउन, आगलागी नियन्त्रण र धुवाँबाट हुने रोगहरु न्यूनीकरण गर्ने उद्देश्यले गाउँपालिकाका सबै घरधुरीलाई ग्याँस सिलिण्डर र चुलो वितरण गर्न सुरु गरिएको अध्यक्ष शाहले बताए ।

गाउँपालिकाले प्रत्येक घरधुरीका अगुवासँग घरमा शौचालय निर्माण गरी नियमित प्रयोग गर्ने, उमेर पुगेका बालबालिकालाई नियमित बिद्यालय पठाउनुपर्ने, कोभिड लगायत बालबालिकालाई सबै खोप लगाई पूर्ण खोपयुक्त गाउँपालिका बनाउने प्रतिवद्धता समेत लिएको छ ।

त्यस्तै बालबिवाह, बालश्रममुक्त परिवारको निर्माण गरी बालमैत्री स्थानीय शासन सञ्चालनमा सहयोग पुर्याउनुपर्ने, लैङ्गिक तथा घरेलु हिंसा गर्न नपाइने, जातिय तथा धार्मिक छुवाछुत र भेदभाव गरे कानन बमोजिम कारबाही सहने छु भन्ने प्रतिवद्धतापत्रमा हस्तक्षर समेत गराएर ग्याँस सिलिण्डर र चुलो वितरण गरेको प्रमुख प्रशासकीय अधिकृत दलबहादुर बस्नेतले बताए ।

गाउँपालिकाले खाना पकाउने प्रयोजनका लागि प्रति परिवार ग्याँस भरिएको सिलिण्डर १ थान, चुल्हो १ थान, पाइप २ मिटर, लाइटर १ थान दिएको छ । उक्त ग्याँस तथा सिलिण्डर गलतरुपमा प्रयोग भएको पाइएमा कारबाही गरिने गाउँपालिकाका प्रमुख प्रशासकीय अधिकृत बस्नेतले बताए ।

प्रकाशित मिति: आइतबार, पुस १८, २०७८ १६:१७