बाघको आक्रमणबाट राप्तीसोनारीकी महिलाको ज्यान गयो

स्थानीय

गृहपृष्ठ
स्थानीय
बाघको आक्रमणबाट राप्तीसोनारीकी महिलाको ज्यान गयो

बाघको आक्रमणबाट राप्तीसोनारीकी महिलाको ज्यान गयो

बाघबाट शव छुटाउन दुई राउण्ड गोली प्रहार

बिहीबार, पुस २२, २०७८ बागेश्वरी पोस्ट

नेपालगञ्ज । बाघको आक्रमणबाट बाँकेको राप्तीसोनारीमा एक महिलाको ज्यान गएको छ । राप्तीसोनारी गाउँपालिका वडा नम्बर ४ प्रसोहनाकी ५२ बर्षीया लिला बिष्टको ज्यान गएको हो ।

विहान ११ बजेतिर स्थानीय जंगलमा स्याउला लिन गएकी उनलाई बाघले आक्रमण गरेको थियो । उनको शब सामुदायिक वनको घट्टखोलामा फेला परेको हो । उनीसंगै अन्य दुई महिला पनि संगै थिए । तर, उनीहरु भागेर बाँच्न सफल भएका छन् । जलहन सामुदायिक वनको तीन पाने भन्ने ठाउँमा बाघले उनलाई झम्टेको प्रहरीले जनाएको छ ।

बाघबाट शब छुटाउन प्रहरीले दुई राउण्ड गोली समेत प्रहार गरेको छ । इलाका प्रहरी कार्यालय धामपुरको प्रहरी टोली र स्थानीय बासिन्दाहरुले महिलाको रगत चुस्दै गरेको अवस्थामा फेला पारेका हुन् । बाघले मान्छेहरु देखेर पनि शव नछोडेपछि प्रहरीले दुई राउण्ड गोली समेत प्रहार गरेको थियो । इलाका प्रहरी कार्यालय धामपुरका प्रहरी इन्चार्ज प्रहरी नायव निरिक्षक मुकुन्द सिग्देलले भने-"एक राउण्ड प्रहार गर्दा झम्टिन खोज्यो, त्यसपछि फेरि दोस्रो राउण्ड गोली प्रहार गर्दा मात्र बाघ भागेपछि शव बरामद गर्यौं ।"

यसअघि बुधबार पनि जंगलमा पात टिप्न गएका महिलालाई पाटेबाघले आक्रमण गरेको थियो । राप्ती सोनारी गाउँपालिका वडा नम्बर ४ बैजापुर नयाँ बस्तीकी ३० बर्षीया महिला दुर्गा थारुलाई बुधबार बिहान बाघले आक्रमण गरेको हो । बाघको आक्रमणमा परेपनि उनी बाँच्न सफल भएकी थिइन् । केही दिन अघि पनि राप्ती सोनारी ५ र ६ को जंगलमा एक जना शिक्षकलाई बाघले झम्टिएको थियो । मोटरसाइकलमा सवार उनी बाँच्न सफल भएका थिए ।

आजको घटनासंगै बाघले तीन महिनाको अवधिमा बाँकेको राप्तीसोनारी र नरैनापुरमा तीन जनाको ज्यान लिइसकेको छ । यी घटना दोहोरिरहेपछि बैजापुरमा त्रास बढेको छ । स्थानीयहरु त्रसित बनेका छन् ।

प्रकाशित मिति: बिहीबार, पुस २२, २०७८ १४:२९

प्रतिक्रिया दिनुहोस्