बाँके ट्राफिक मापसे गर्ने माथि कडारुपमा प्रस्तुत हुँदै

स्थानीय

गृहपृष्ठ
स्थानीय
बाँके ट्राफिक मापसे गर्ने माथि कडारुपमा प्रस्तुत हुँदै

बाँके ट्राफिक मापसे गर्ने माथि कडारुपमा प्रस्तुत हुँदै

सरप्राइज चेकिङ गर्छौःप्रमुख शाह

शुक्रबार, पुस २३, २०७८ बागेश्वरी पोस्ट

बाँके ट्राफिक प्रमुख शाह

नेपालगन्ज । बाँके ट्राफिकले मादक पदार्थ सेवन गरेर सवारी साधन चलाउनेमाथि निगरानी बढाउने भएको छ । जिल्ला ट्राफिक प्रहरी कार्यालय बाँकेको प्रमुखका रुपमा आएको करिब दुई सातापछि बाँके ट्राफिक प्रमुख प्रहरी निरीक्षक हिमालय शाहले आज कोहलपुरमा पत्रकारहरुसँग परिचयात्मक कार्यक्रम गर्दै मादक पदार्थ सेवन गरेर सवारी चलाउनेमाथि कडा कारवाही गर्ने बताएका हुन् ।

उनका अनुसार पछिल्लो समय दिउँसै मादक पदार्थ सेवन गरेर सवारी साधन चलाउने गरेको पाइएको छ । शाहले जाडोयाम शुरु भएसँगै दिउँसै मापसे गरेर सवारी साधन चलाउने गरेका कारण दुर्घटनाको जोखिम बढेकाले ट्राफिक प्रहरीले उनीहरु विरुद्ध कडाई गर्ने बताए । उनले मापसेलाई निरुत्साहित गर्न सरप्राइज चेकिङ शुरु गरिने जानकारी दिए ।

उनले अटो रिक्सा, ई-रिक्सा व्यवस्थापनका लागि नेपालगञ्ज उपमहानगरपालिकासँग समन्वय गरेर ई-रिक्सा दर्ताको काम भइरहेको पनि जानकारी दिए । नेपालगञ्ज र कोहलपुर क्षेत्रमा मालबाहक सवारी साधान तोकिएको समयमा लोड अनलोड गर्ने व्यवस्था मिलाउन पहल गरिने शाहले बताए । अनटेष्ट र नम्वर प्लेट स्पष्ट नभएका सवारी साधानहरुमा नम्वर प्लेट बनाउन लगाउने कार्यलाई पनि कडाई गरिने उनले बताए ।

उपलब्ध जनशक्ति र स्रोतसाधनको उपयोग गरेर दुर्घटना न्यूनीकरणको प्रयास गरिने उनको भनाई छ । आफ्नो कार्यकालमा ट्राफिक व्यवस्थापनमा सुधारको महसुस गराउने गरी काम गर्ने बताए ।

त्यस क्रममा जिल्ला ट्राफिक प्रहरी कार्यालय बाँकेले चालू आर्थिक बर्षको मंसिर महिनासम्ममा ९२ लाख २१ हजार राजश्व संकलन गरेको जानकारी दिइएको छ । यो पाँच महिनाको अवधिमा ट्राफिक नियम उल्लंघन गर्ने १६ हजार ८ सय ५ वटा सवारी साधनलाई कारबाही गरिएको छ ।

प्रकाशित मिति: शुक्रबार, पुस २३, २०७८ १९:५२