बाँकेमा डकैती गर्ने भारतीय डाँकाहरु हतियारसहित बाँके प्रहरीद्वारा पक्राउ

सुरक्षा-अपराध

गृहपृष्ठ
सुरक्षा-अपराध
बाँकेमा डकैती गर्ने भारतीय डाँकाहरु हतियारसहित बाँके प्रहरीद्वारा पक्राउ

बाँकेमा डकैती गर्ने भारतीय डाँकाहरु हतियारसहित बाँके प्रहरीद्वारा पक्राउ

शनिबार, माघ २९, २०७८ बागेश्वरी पोस्ट

नेपालगन्ज । घरमा डकैती गरेर फरार भएका दुई जना भारतीय डाँकाहरुलाई कटुवा पेस्तोलसहित जिल्ला प्रहरी बाँकेले पक्राउ गरेको छ ।

खजुरा गाउँपालिकाको डि गाउँस्थित हरिप्रकाश विकको घरमा गत माघ १७ गते राती डकैती गरी ५० हजार नगद रुपैयाँ, ३ दशमलब ५ तोला सुन र एउटा पल्सर मोटरसाइकल लुटेर फरार भएका दुई जना भारतीय डाँकाहरुलाई आज दिउँसो जानकी गाउँपालिका ५ बुढीया गाउँबाट इलाका प्रहरी कार्यालय खजुराखुर्दबाट गएको टोलीले पक्राउ गरेको हो ।

जिल्ला प्रहरी बाँकेका अनुसार पक्राउ परेका डाँकाहरुमा भारतको बहराइच जिल्लाको रुपइडिहा नजिक निबिया घर भएका २६ बर्षीय डब्लु मनिहार र सोही जिल्लाकै बाबागन्जको बाबाकुटीका २८ बर्षीय निजामुद्दिन कवडिया रहेका छन् ।

उक्त डाँकाको समूहले लुटेको उक्त २२० सिसीको पल्सर मोटरसाइकललाई प्रहरीले बर्दियाको बढैयाताल गाउँपालिका ५ बढैयाताल नजिकै रहेको पोखरीमा फेला पारेको जिल्ला प्रहरी बाँकेले जनाएको छ । प्रहरीले उनीहरुलाई पक्राउ गरेपछि अन्य डकैतीका घटना समेत खुल्न आएका छन् ।

यसअघि उक्त डाँका समूहले गत पुस २९ गते राती बढैयाताल गाउँपालिका ८ शितबजारस्थित पर्शुराम सार्कीको घरबाट पेस्तोल देखाउँदै ३ लाख ३५ हजार नगद रुपैयाँ र सुनका गरगहना लुटेको खुल्न आएको जिल्ला प्रहरी बाँकेले जनाएको छ । पक्राउ गरिएका दुबै भारतीय डाँकाहरुसँग थप अनुसन्धान भइरहेको हुँदा अन्य डकैतीका घटनाहरु समेत खुल्न सक्ने जिल्ला प्रहरी बाँकेले जानकारी दिएको छ ।

प्रकाशित मिति: शनिबार, माघ २९, २०७८ १४:५०