बाँके प्रहरीको ठुलो सफलता:९० ग्राम ब्राउन सुगर र आधुनिक पेस्तोलसहित तीन जना पक्राउ

सुरक्षा-अपराध

गृहपृष्ठ
सुरक्षा-अपराध
बाँके प्रहरीको ठुलो सफलता:९० ग्राम ब्राउन सुगर र आधुनिक पेस्तोलसहित तीन जना पक्राउ

बाँके प्रहरीको ठुलो सफलता:९० ग्राम ब्राउन सुगर र आधुनिक पेस्तोलसहित तीन जना पक्राउ

चौकी इन्चार्ज बमले लागूऔषध कारोबार ध्वस्त पार्दै

आइतबार, फागुन २२, २०७८ बागेश्वरी पोस्ट

प्रहरी चौकी राधापुर,बाँके

नेपालगन्ज । बाँके प्रहरीले ५ दिनको अन्तरालमा फेरि अत्याधुनिक स्वचालित पेस्तोल र ठुलो परिमाणमा ब्राउन सुगरसहित तीन जनालाई पक्राउ गरेको छ ।

खजुरा गाउँपालिका १ स्थित प्रहरी चौकी राधापुरका इन्चार्ज प्रहरी नायब निरीक्षक रबिन्द्र बमको कमान्डमा खटिएको टोलीले आइतबार दिउँसो ३ बजे ९० ग्राम ब्राउन सुगर, एक थान अत्याधुनिक स्वचालित पेस्तोलसहित तीन जना युवकहरुलाई पक्राउ गरेको जिल्ला प्रहरी कार्यालय बाँकेले जानकारी दिएको छ ।

बिशेष सूचनाका आधारमा प्रहरी नायब निरीक्षक बमको कमान्डमा गएको टोलीले खजुरा गाउँपालिका १ बहादुरपुर स्थित २५ बर्षीय रबिन्द्र थापाको घरबाट सेतो प्लास्टिकमा बेरिएर राखिएको ९० ग्राम ब्राउन सुगर र घरमा लुकाईराखेको अवस्थामा स्वचालित पेस्तोलसहित सोही घरका रबिन्द्र थापा, खजुरा २ का २७ बर्षीय मनिष थापा र नेपालगन्ज १३ का २८ बर्षीय सुरेश रोका मगरलाई पक्राउ गरेको जिल्ला प्रहरी बाँकेले जानकारी दिएको छ । बाँके प्रहरीले पक्राउ परेका तीनै जनाले ब्राउन सुगर समेत सेवन गर्दै गरेको अवस्थामा पक्राउ गरिएको जनाएको छ ।

केही हप्ता अघि मात्र १५२ ग्राम ब्राउन सुगर बरामद गरेको बाँके प्रहरीले पुन: २ हप्ता अघि मात्र प्रहरी चौकी राधापुरको इन्चार्ज सम्हालेका बमले ठुलो परिमाणमा ब्राउन सुगर बरामद गर्न सफल भएका छन् ।

यता अपराध नियन्त्रण गर्न लागिपर्ने र तस्करीविरुद्ध कुनै सम्झौता नगर्ने सोचका साथ कार्य गरिरहेका बाँके प्रहरी प्रमुख प्रहरी उपरीक्षक श्यामकृष्ण अधिकारीले बाँकेमा लागूऔषध कारोबारीको किल्ला नै ध्वस्त बनाउँदै गएका छन् । बाँके प्रहरीको कमान्ड सम्हालेको ८ महिनामा प्रहरी उपरीक्षक अधिकारीले ९ सय बढी फरार प्रतिवादीलाई पक्राउ गर्नुका साथै सयौंको संख्यामा लागूऔषध कारोबारी धमाधम पक्राउ गर्न सफल भएका छन् । त्यस्तै प्रहरी उपरीक्षक अधिकारीले शान्तिसुरक्षामा खलबल पुर्याएका दर्जनौंलाई हतियारसहित पक्राउ गर्दै १० करोड बढीको राजस्व संकलन गरिसकेका छन् ।

प्रहरी उपरीक्षक अधिकारीझैं खरो स्वभाव भएका राधापुर प्रहरी चौकीका इन्चार्ज प्रहरी नायब निरीक्षक बमले पनि आफुले अपराध नियन्त्रण र तस्करीविरुद्ध कुनै सम्झौता नगर्ने बताएका छन् ।

पक्राउ परेका तीनै जना लागूऔषध कारोबारी समेत हुन सक्ने प्रारम्भिक अनुसन्धानमा खुल्न आएको प्रहरीले बताएको छ । उनीहरुलाई लागूऔषध र हातहतियार तथा खरखजाना ऐन अन्तर्गत् अनुसन्धान गरिरहेको जिल्ला प्रहरी बाँकेले जानकारी दिएको छ ।

प्रकाशित मिति: आइतबार, फागुन २२, २०७८ २१:५५

प्रतिक्रिया दिनुहोस्