नेपालगन्जबाट रेडपाण्डाको छाला र ३ किलो चरेससहित पक्राउ परेका ६ जना सार्वजनिक

सुरक्षा-अपराध

गृहपृष्ठ
सुरक्षा-अपराध
नेपालगन्जबाट रेडपाण्डाको छाला र ३ किलो चरेससहित पक्राउ परेका ६ जना सार्वजनिक

नेपालगन्जबाट रेडपाण्डाको छाला र ३ किलो चरेससहित पक्राउ परेका ६ जना सार्वजनिक

आइतबार, चैत ६, २०७८ बागेश्वरी पोस्ट

रेडपाण्डाको छालासहित पक्राउ परेका अभियुक्तहरु

नेपालगन्ज । जिल्ला प्रहरी बाँकेले आज बिहान दुर्लभ वन्यजन्तु रेडपाण्डाको छाला र तीन किलो चरेससहित पक्राउ परेका ६ जनालाई पत्रकार सम्मेलनमार्फत् सार्वजनिक गरेको छ।

रेडपाण्डाको छाला बिक्रीवितरण हुँदैछ भन्ने बिशेष सूचनाका आधारमा जिल्ला प्रहरी बाँकेबाट प्रहरी सहायक निरीक्षक बिबेक अधिकारीको कमान्डको टोलीले आज बिहान साढे ११ बजे नेपालगन्ज १२ स्थित नेपालगन्ज मेडिकल कलेजको ( नर्सिङ होम) पश्चिमतर्फ रहेको अन्जना होटेल एन्ड लजको १०५ नम्बर कोठाबाट २ थान दुर्लभ वन्यजन्तु रेडपाण्डाको छालासहित पक्राउ गरेका ४ जनालाई जिल्ला प्रहरी बाँकेले आज दिउँसो कार्यालयमा पत्रकार सम्मेलन गरेर जानकारी दिएको हो ।

पक्राउ पर्नेमा त्रिपुरासुन्दरी नगरपालिका ३ डोल्पाका २३ बर्षीय बिकेश बोहरा, सोही स्थानकै ३६ बर्षीय हर्कबहादुर बिक, सोही वडाकै २२ बर्षीय रामकृष्ण शाहिर ठूलोभेरी नगरपालिका ९ डोल्पा २५ बर्षीय सुकराम बिक रहेको जिल्ला प्रहरी बाँकेले जनाएको छ ।

त्यस्तै जिल्ला प्रहरी कार्यालय बाँकेले आज मध्याह्न १२ बजे ३ किलो चरेससहित पक्राउ परेका अन्य २ जनालाई पनि पत्रकार सम्मेलन गर्दै सार्वजनिक गरेको छ ।

नेपालगन्ज २ स्थित पुष्पलाल चोक नजिक रहेको दङ्गाली स्याङ्जाली होटेलमा चरेसको बिक्रीवितरण हुँदैछ भन्ने सूचनाका आधारमा सादा पोशाकमा खटिएको प्रहरी टोलीले सोही होटेलकै कोठा नम्बर ७ बाट प्लास्टिकमा बेरिएर राखेको अवस्थामा ३ किलो चरेससहित पक्राउ परेका खाँडाचक्र नगरपालिका ९ कालिकोटका २५ बर्षीय प्रबिन बिष्ट, सोही नगरपालिकाको वडा नम्बर ७ का २३ बर्षीय राजकुमार कार्कीलाई बाँके प्रहरीले आजै सार्वजनिक गरेको हो ।

छुट्टाछुट्टै घटनामा पक्राउ परेका ६ जनालाई हिरासतमा राखेर थप अनुसन्धान भइरहेको जिल्ला प्रहरी बाँकेले जानकारी दिएको छ ।