सम्पर्कविहिन ताराको जहाजका पाइलटको मोबाइलको घण्टी बज्यो, टिटी लेक आसपास खोजी कार्य गरिँदै

समाचार

गृहपृष्ठ
समाचार
सम्पर्कविहिन ताराको जहाजका पाइलटको मोबाइलको घण्टी बज्यो, टिटी लेक आसपास खोजी कार्य गरिँदै

सम्पर्कविहिन ताराको जहाजका पाइलटको मोबाइलको घण्टी बज्यो, टिटी लेक आसपास खोजी कार्य गरिँदै

आइतबार, जेठ १५, २०७९ बागेश्वरी पोस्ट

फाइल फोटो

नेपालगन्ज । आज बिहानदेखि सम्पर्कविहिन भएको तारा एयरको जहाजका क्याप्टेन प्रभाकर घिमिरेको फोन ट्र्याक भएको नागरिक उड्डयन प्राधिकरणका अधिकारीहरुले जनाएका छन् । उक्त क्षेत्रमा मोबाइलमा घण्टी बजिरहेकाले लेते आसपासमा लोकेसन पत्ता लागेको हो ।

पाइलटको मोबाइलमा घण्टी गइरहेको छ । एनटिसीबाट ट्र्याक गर्दा मोबाइलको लोकेसन लेते भनेर देखाएकोले त्यतैतिर खोजी केन्द्रित गरिरहेको प्राधिकरणले जानकारी दिएको छ ।

उक्त क्षेत्रमा मौसम खराब भएकाले खोजीका लागि हेलिकप्टर पठाउन कठिन भइरहेको छ । उक्त क्षेत्रमा पोखराबाट नेपाली सेनाको हेलिकप्टर पठाउने तयारी गर्दा प्रतिकूल मौसमका कारण तत्काल सम्भव नदेखिएकाले जोमसोमबाटै लेतेतर्फ हेलिकोप्टर परिचालन गर्ने तयारी गरिरहेको प्राधिकरणले जनाएको छ ।

१९ जना यात्रु र ३ जना चालक दलका सदस्य गरी २२ जना सवार ९ एन एईटी कलसाइनको जहाज आज बिहान ९ बजेर ५५ मिनेटमा पोखराबाट मुस्ताङका लागि उडेको थियो । जहाज सिनियर क्याप्टेन प्रभाकर घिमिरेले उडाएका हुन् ।

बिहान ९ बजेर ५५ मिनेटमा पोखराबाट जोमसोमका लागि उडेको उक्त जहाज १० बजेर १५ मिनेटमा जोमसोम विमानस्थलमा अवतरण गर्नुपर्ने थियो । तर उक्त जहाज जोमसोम विमानस्थलको टावरसँग १० बजेर ७ मिनेटमा म्याग्दीको घोडेपानीबाट सम्पर्कमा आएको थियो । त्यसपछि जहाज सम्पर्कविहीन भएको हो ।

प्रकाशित मिति: आइतबार, जेठ १५, २०७९ १४:१९