एसिसी प्रिमियर कप: नेपालले ओमानलाई ८४ रनले हरायो

खेलकुद

गृहपृष्ठ
खेलकुद
एसिसी प्रिमियर कप: नेपालले ओमानलाई ८४ रनले हरायो

एसिसी प्रिमियर कप: नेपालले ओमानलाई ८४ रनले हरायो

शुक्रबार, वैशाख ८, २०८० बागेश्वरी पोस्ट

नेपालगन्ज । एसीसी प्रिमियर कप क्रिकेटको समूह 'ए' को दोस्रो खेलमा नेपालले ओमानलाई ८४ रनले पराजित गरेको छ ।

भर्खरै सम्पन्न भएको खेलमा नेपालले दिएको ३११ रनको लक्ष्य पछ्याएको ओमानले २२६ रन मात्र बनाउन सक्यो ।

४६.३ ओभरमा ९ औं विकेट गुमाएको ओमानका अन्तिम ब्याट्सम्यान घाइते भएका कारण क्रिजमा आउन सकेनन् र नेपाल विजयी भएको हो ।

टस हारेर पहिले ब्याटिङ गरेको नेपालले कुशल मल्लको शानदार शतक र सोमपाल कामीको शानदार अर्धशतकको मद्दतले ८ विकेटको क्षतिमा ३१० रन बनायो ।

नेपालले एक दिवसीयमा पहिलो पटक तीन सय रनको योगफल पूरा गरेको हो । एक दिवसीय खेलमा नेपालले यसअघि आईसीसी विश्वकप क्रिकेट लिग–२ मा पपुवा न्यूगिनीविरुद्ध २९७ रन बनाएको थियो । यस अर्थमा नेपालले व्यक्तिगततर्फ कीर्तिमान बनायो ।

कुशलले यसअघि चार वटा अर्धशतक बनाए पनि एक दिवसीयमा शतक भने बताउन सकेका थिएनन् । उनले शतक बनाएर कीर्तिमान बनाए।

कुशलले नेपाली टिम कमजोर अवस्थामा रहेका बेलामा उत्कृष्ट खेल खेल्दै शतक बनाएका हुन् । उनले मात्र ५९ बलमा पहिलो शतक बनाएका हुन् । सो क्रममा उनले ९ छक्का र ९ चौकाको प्रहार गरेका थिए ।

उनी एक दिवसीयमा शतक बनाउने छैटौं नेपाली खेलाडी हुन् । तर, उनको नाममा शानदार कीर्तिमान बन्यो । उनी कम बलमा शतक बनाउने पहिलो नेपाली खेलाडी बन्न सफल भए ।

उनी ६४ बलमा १०८ रन बनाएर आउट भएका छन् । यसअघि कप्तान रोहित पौडेलले ९५ बलमा शतक बनाएर छिटो शतक बनाउने कीर्तिमान आफ्नो नाममा राखेका थिए ।

त्यस्तै सोमपालले ४८ बलमा अविजित रहँदै ६३ रन बनाए । उनले नौ चौका प्रहार गरे । उनको यो दोस्रो एक दिवसीय अर्धशतक हो । त्यस्तै करण केसीले १५ बलमा अविजित रहँदै २९ रन बनाए ।

नेपालले कमजोर शुरुआत गर्यो । नेपालले रनको खाता खोल्नु अघि नै शुरुआती दुई विकेट गुमाउन पुग्यो । नेपालका लागि कुशल भुर्तेल ८ बल र आसिफ शेखले १० बल खेलेर रन नबनाइ आउट भए । नेपालले ४.४ ओभर अर्थात् २८ बलमा पहिलो रन बनाएको थियो ।

तर, त्यसपछि आएका भीम सार्की र कप्तान रोहित पौडेलले भने आकर्षक खेले । दुवैले तेस्रो विकेटका लागि ५४ रनको साझेदारी गरे । सो क्रममा रोहित २३ तथा भीम ३३ रन बनाएर आउट भए । आरिफ शेखले २९ रन बनाए । त्यस्तै सन्दीप लामिछाने ८ तथा दिपेन्द्र सिंह ऐरी ७ रनमा आउट भए ।

ओमान नेपाल भन्दा बलियो टिम हो । उसले विश्वकप लिग २ मा दोस्रो स्थानमा रहेर विश्वकपमा सिधै छनोट चरण खेल्न पाएको थियो । नेपाल भने तेस्रो भएर ।

शुक्रबारको खेलमा कीर्तिपुर मैदानमा ओमानले २२६ रन मात्र जोड्न सक्यो । उसले ४६।३ ओभरमा अलआउट हुँदै उक्त योगफल बनाएको हो । ओमानका लागि मोहम्मद नदीमले सर्वाधिक ६५ रन बनाए । त्यस्तै सन्दीप गोउडले ४६ रन जोडे । ९९ रन जोड्दा ओमानले ५ विकेट गुमाएको भए पनि सम्मानजनक स्कोर जोड्न सक्यो ।

नेपालका लागि सन्दीप लामिछाने र करण केसीले ३–३ विकेट लिए । त्यस्तै दिपेन्द्र सिंह ऐरीले २ तथा ललित राजवंशीले १ विकेट लिए ।

प्रकाशित मिति: शुक्रबार, वैशाख ८, २०८० १६:४३