नेपाली बलरहरु जसले नेपाललाई एसीसी प्रिमियर कपमा समूहको शिर्ष स्थानमा पुर्याए....

खेलकुद

गृहपृष्ठ
खेलकुद
नेपाली बलरहरु जसले नेपाललाई एसीसी प्रिमियर कपमा समूहको शिर्ष स्थानमा पुर्याए....

नेपाली बलरहरु जसले नेपाललाई एसीसी प्रिमियर कपमा समूहको शिर्ष स्थानमा पुर्याए....

बिहीबार, वैशाख १४, २०८० बागेश्वरी पोस्ट

नेपालगन्ज । एसीसी प्रिमियर कप क्रिकेटको समूह चरणको नेपालको समूह चरणको अन्तिम खेलमा नेपाली बलरले तहल्का मच्चाउन सफल भएका छन् । उनीहरुको ठुलो योगदानले नेपाललाई समूहको शिर्ष स्थानम पुर्याउन सफल बनेका छन् ।

आज बिहान कीर्तिपुरमा पहिले ब्याटिङ गरेको नेपालले खराब प्रदर्शन गर्दै ४०.३ ओभरमा सबै विकेट गुमाएर १५७ रन मात्र बनाएको नेपाललाई ब्याटिङमा समेत बलरहरुले पार लगाएका थिए ।

जितको आशाहिन लक्ष बोकेर कतारको ब्याटिङको सामना गर्न मैदानमा उत्रिएको नेपाललाई पुनः बलरहरुले जबर्जस्त खेल्दै कतारलाई ८९ रनमै अल आउट गर्न सफल भएका छन् ।

नेपालले १११ रन जोड्दा ९ विकेट गुमाइसक्दा स्पिन बलर सन्दीप लामिछानेले खेललाई जोगाई सर्वाधिक ४२ रन बनाए । उनले ५८ बलमा ६ चौकाको मद्धतले उक्त योगफल बनाएका हुन् ।

सन्दीपको यो एक दिवसीय क्रिकेटको सबैभन्दा ठूलो योगफल हो । दशौं विकेटका लागि सबैभन्दा ठूलो साझेदारी भएको थियो । सन्दीप र ललितनारायण राजवंशीबीच ४६ रनको साझेदारी भएको थियो । ललितले १७ बलको सामना गर्दै मात्र १ रन बनाएका थिए ।

कप्तान रोहित पौडेलले २७ तथा आसिफ शेखले १९ रन बनाए । अमिर फारुकले ४ तथा ओवाइस अहमदले ३ विकेट लिए ।

नेपालले यही खेलमा कीर्तिमान बनाउन सक्ने थियो । समूहको कमजोर टिमविरुद्ध उच्च योगफल बनाउन सक्थ्यो । तर, नेपालले त जारी प्रतियोगितामै सबैभन्दा कमजोर ब्याटिङ गर्यो ।

नेपालले कमजोर ब्याटिङ गरेको भए पनि बलिङ भने सशक्त गर्यो । सोही कारण कतारले २५.१ ओभरमा सबै विकेट गुमाएर मात्र ८९ रन बनाउन सक्यो ।

जहीर अब्राहिम र खुराम शहजादले समान १५–१५ रन बनाएको इनिङ्समा नेपालका लागि अलराउण्ड प्रदर्शन गरेका सन्दीपले ९.१ ओभरमा ३ मेडन राख्दै १४ रन खर्चेर सर्वाधिक ५ विकेट लिए । त्यस्तै सोमपाल कामीले ३ तथा ललितनारायण राजवंशीले २ विकेट लिए ।

कीर्तिपुर मैदानमा यही प्रतियोगिताको समूह चरणको खेलमा यूएईले सिंगापुरमाथि कीर्तिमानी रन बनाएको थियो । यूएईले एकै इनिङ्समा ४७१ रन बनाएको थियो । र, सिंगापुरले पनि २७० रन बनाएको थियो ।

समग्रमा एकै दिन एकै खेलमा ७४१ रन बनेको थियो । नेपालले घरेलु मैदानमा घरेलु दर्शकलाई भरपूर मनोरञ्जन दिलाउने क्रममा रेकर्ड बनाउने अवसर रहे पनि टस हारेर ब्याटिङको मौका पाउँदा समेत कम योगफलमा समेटियो ।

समूह ए बाट नेपाल ४ खेलमा ३ मा जित र एकमा बराबरीसहित ७ अंकबाट शीर्ष स्थानमा रहँदै समूह विजेता बन्दै सेमिफाइनलमा पुग्यो भने ओमान ४ खेलमा ३ मा जित र १ मा हारसहित ६ अंकका साथ उपविजेता बन्दै सेमिफाइनलमा पुग्यो ।

१० राष्ट्र सहभागी प्रतियोगितामा पाँच पाँच राष्ट्रको दुई समूह रहेको छ । हरेक समूहका दुई राष्ट्रले शनिबार हुने सेमिफाइनल खेल्नेछन् ।

आजको अर्को खेलमा हङकङ र कुवेत भिडिरहेका छन् । विजेता सेमिफाइनलमा पुग्नेछ । ६ अंकका साथ यूएई सेमिफाइनलमा पुगिसकेको छ । ५ अंकको हङकङ र ४ अंकको कुवेतको विजेता सेमिफाइनलमा पुग्ने भएको हो ।

आगामी सोमबार फाइनल हुनेछ । उपाधि विजेता टोली एसिया कपमा खेल्न पाउनेछ । एसिया कपमा यो विजेता टोली भारत र पाकिस्तानको समूहमा रहेर खेल्नेछ । एसिया कप आगामी सेप्टेम्बरमा आयोजना हुनेछ । यस्तै शीर्ष तीनमा रहने टोली एसीसी इमर्जिङ कपका लागि छनोट हुनेछन् ।

प्रकाशित मिति: बिहीबार, वैशाख १४, २०८० १६:०२