नेपालको विश्वकप छनौट यात्रा समाप्त, नेदरल्यान्डसँग ७ विकेटले पराजित

खेलकुद

गृहपृष्ठ
खेलकुद
नेपालको विश्वकप छनौट यात्रा समाप्त, नेदरल्यान्डसँग ७ विकेटले पराजित

नेपालको विश्वकप छनौट यात्रा समाप्त, नेदरल्यान्डसँग ७ विकेटले पराजित

शनिबार, असार ९, २०८० बागेश्वरी पोस्ट

नेपालगन्ज । नेपालको विश्वकप छनोट क्रिकेटको यात्रा समाप्त भएको छ । जिम्बाब्वेमा जारी आईसीसी विश्वकप छनोट क्रिकेट प्रतियोगिताको चौथो तथा समूह चरणको अन्तिम खेलमा नेदरल्याण्ड्ससँग पराजय बेहोरेसँगै नेपालको विश्वकप छनोटको यात्रा टुङ्गिएको हो ।

नेदरल्याण्ड्सविरुद्ध नेपालले जारी छनोटकै सबैभन्दा कमजोर प्रदर्शन गर्ने क्रममा ७ विकेटको हार बेहोर्यो । खेलमा नेपालले कमजोर ब्याटिङ प्रदर्शन गर्ने क्रममा दुई पटकको विश्वकप विजेता वेष्ट इन्डिज तथा नियमितजसो विश्वकपमा सहभागी जिम्बाब्वेविरुद्ध जोडेको योगफलभन्दा कमजोर स्कोर खडा गर्यो ।

टस हारेर पहिले ब्याटिङ गरेको नेपालले ४४.३ ओभरमा अलआउट हुँदै १६७ रनमात्र बनाउन सक्यो । नेपालका लागि कप्तान रोहित शर्माले सर्वाधिक ३३ रन बनाए । त्यस्तै सन्दीप लामिछाने र कुशल भुर्तेलले समान २७ तथा भीम शार्कीले २२ रन बनाए । जिम्बाब्वेका लागि लोगन भान बिकले ४ विकेट लिए ।

जवाफमा नेदरल्याण्ड्सले २७.१ ओभरमै ३ विकेटको क्षतिमा जित हासिल गर्यो । नेपालका लागि सन्दीप लामिछानेले २ तथा गुल्सन झाले १ विकेट लिए ।

यसअघि नेपालले वेष्ट इन्डिजविरुद्ध २३८ रन बनाएको थियो भने आयोजक जिम्बाब्वेविरुद्ध २९० रन बनाएको थियो ।

सुपर सिक्समा पुग्नका लागि नेपालले यो खेल फराकिलो अन्तरले जित्नैपर्ने दबाब थियो । तर नेपालले कमजोर प्रदर्शन गर्दै बाहिरियो ।

सुपर सिक्समा पुगेको भए नेपालले थप सिक्ने अवसर पाउने थियो । तर नेपालले समूहमा अमेरिकालाई मात्र हराउन सक्यो ।

यो समूहबाट जिम्बाब्वे, वेष्ट इन्डिज र नेदरल्याण्ड्स सुपर सिक्समा पुगेका छन् । नेपाल र अमेरिका बाहिरिएका छन् ।

यसअघि नेपालले अमेरिकालाई ६ विकेटले हराउँदा जिम्बाब्वेसँग ८ विकेट तथा वेष्ट इन्डिजसँग १ सय १ रनको फराकिलो अन्तरको हार बेहोरेको थियो ।

समूह चरणको अवस्था

समूह एमा रहेको नेपालको टिममा आयोजक जिम्बाब्वे, वेष्ट इन्डिज र अमेरिकासँगै नेदरल्याण्ड्स रहेका छन् ।

अर्को समूह

समूह बी मा २ खेलबाट ४ अंकसहित श्रीलंका शीर्ष स्थानमा छ । स्कटल्याण्ड २ खेलबाट ४ अंकसहित दोस्रो तथा ओमान ३ खेलबाट ४ अंकसहित तेस्रो स्थानमा रहेको छ ।

२ खेलबाट अंकविहीन आयरल्याण्ड र ३ खेलबाट अंकविहीन यूएई पुछारमा रहेका छन् । यूएई औपचारिक रुपमै सुपर सिक्स प्रवेशको सम्भावनाबाट बाहिरिएको छ भने आयरल्याण्डको अंक गणितीय सम्भावना कायमै छ ।

यस्तो छ विश्वकप छनोटको प्रतियोगिता

जिम्बाब्वेमा जारी विश्वकप छनोटमा सहभागी १० टोलीमा दुई टोलीले भारतमा हुने विश्वकप खेल्न पाउनेछन् । टोलीलाई दुई समूहमा विभाजन गरिएको छ । समूह ए मा नेपाल, जिम्बाब्वे, अमेरिका वेष्ट इन्डिज र नेदरल्यान्ड्स रहेका छन् । समूह बी मा श्रीलंका, आयरल्यान्ड, ओमान, यूएई र स्कटल्याण्ड छन् ।

हरेक समूहबाट शीर्ष तीन टोलीले सुपर सिक्समा स्थान बनाउने छन् । जसबाट सुपर सिक्समा अर्को समूहबाट आउने तीन टोलीसँग खेल्नुपर्ने हुन्छ ।

सुपर सिक्समा शीर्ष दुई टोलीले विश्वकपमा स्थान बनाउने छन् । पूर्व विश्व च्याम्पियन वेस्टइन्डिज र श्रीलंकालाई प्रमुख दाबेदार मानिएको छ । जिम्बाब्वे पनि घरेलु मैदानको फाइदा उठाउँदै विश्वकप खेल्न चाहन्छ ।

नेपाल, स्कटल्यान्ड र ओमान आईसीसी विश्वकप लिग टु मा शीर्ष तीनमा रहँदै विश्वकप छनोट खेलिरहेका हुन् । अमेरिका र यूएई लिग टुबाट घटुवा हुँदै विश्वकप छनोट प्लेअफमा शीर्ष दुईमा रहँदै विश्वकप छनोटमा आएका हुन् ।

श्रीलंका, आयरल्यान्ड, नेदरल्यान्ड्स, वेस्ट इन्डिज र जिम्बाब्वे आईसीसी विश्वकप सुपर लिगमा पुछारमा रहँदै छनोट खेलिरहेका हुन् ।

प्रकाशित मिति: शनिबार, असार ९, २०८० १९:०५