बाँकेमा मापसे गरेका चालकलाई जरिवानासँगै एक घण्टा सचेतना कक्षा

सुरक्षा-अपराध

गृहपृष्ठ
सुरक्षा-अपराध
बाँकेमा मापसे गरेका चालकलाई जरिवानासँगै एक घण्टा सचेतना कक्षा

बाँकेमा मापसे गरेका चालकलाई जरिवानासँगै एक घण्टा सचेतना कक्षा

सफल होला त बाँके ट्राफिक प्रहरीको यो अभियान ?

शुक्रबार, चैत १०, २०७९ बागेश्वरी पोस्ट

बाँके ट्राफिक प्रमुख तिलक सुनार

नेपालगन्ज । बाँके ट्राफिक प्रहरीले मादक पदार्थ सेवन (मापसे) गरेर सवारीसाधन चलाउने चालकलाई अनिवार्य एक घण्टा सवारी चालक सचेतना कक्षा दिने भएको छ ।

मापसे गरेर सवारी चलाउने चालकलाई बाँके ट्राफिक प्रहरीले एक हजार रुपैयाँ जरिवाना गर्दै आएको भएपनि बिहीवारदेखि मापसे गरेका चालकले कागजपत्र लिन आउँदा एक घण्टा सवारी चालक सचेतना कक्षा सुरु गरेको बाँके ट्राफिक प्रहरी प्रमुख तिलक सुनारले जानकारी दिएका छन् ।

चेकजाँच गर्दा मापसे सेवन गरी सवारी चलाउने चालकलाई जरिवाना मात्र लिएर छोड्दा त्यति सुधार नआएको पाइएपछि यस्तो निर्णयमा पुगिएको बाँके ट्राफिक प्रमुख सुनारले बताए ।

ट्राफिक प्रहरीले मापसे गरेर सवारी चलाएका चालकहरुलाई काठमाण्डौ उपत्यकामा जरिवानासहित एक घण्टा सवारी चालक सचेतना कक्षा सन्चालन गर्दै आइरहँदा बाँकेमा पनि यो नियम लागू गरिएको ट्राफिक प्रमुख सुनारले जानकारी दिएका छन् ।

केहि समय अघि मात्र बाँके ट्राफिकको कमाण्ड सम्हाल्न आइपुगेका प्रहरी निरीक्षक सुनारले यो नियम लागू गर्दा दुर्घटना न्यूनीकरण धेरै मात्रामा कम हुने विश्वास व्यक्त गरेका छन् ।

'विशेष गरेर यो दुर्घटना न्यूनीकरणका लागि मात्रै नभएर मापसे गरेर सवारीसाधन चलाउन हुँदैन भन्ने एउटा सन्देश पनि भएकाले जनता आफैंमा सचेत भएर यो कक्षा लिन आबश्यक छ' ट्राफिक प्रमुख सुनारले भने ।

बाँके ट्राफिकले सुरु गरेको यो नियम कत्तिको सफल होला ? बाँकेमा के यो सफल बन्ला ? आशा गरौं-बाँके ट्राफिकले मापसे चालकहरुको लागि एक घण्टा सवारी चालक सचेतना कक्षा सफल बनोस् । जनता जागरुक भए यो अवश्य सम्भव छ ।

प्रकाशित मिति: शुक्रबार, चैत १०, २०७९ १०:५०