खजुराको भानु माविमा अयोग्य व्यक्तिलाई अध्यक्ष बनाइएको खुलासा

शिक्षा

गृहपृष्ठ
शिक्षा
खजुराको भानु माविमा अयोग्य व्यक्तिलाई अध्यक्ष बनाइएको खुलासा

खजुराको भानु माविमा अयोग्य व्यक्तिलाई अध्यक्ष बनाइएको खुलासा

आइतबार, चैत १२, २०७९ बागेश्वरी पोस्ट

रविन्द्र घिमिरे, नेपालगञ्ज । बाँकेको खजुरा गाउपालिकास्थित भानु माध्यमिक विद्यालय व्यवस्थापन समितिको अध्यक्षमा योग्यता नपुगेको व्यक्तिलाई अध्यक्ष बनाएको खुलासा भएको छ । खजुरा गाउँपालिका वडा नम्वर ६ उढरापुरस्थित भानु माध्यमिक विद्यालय व्यवस्थापन समितिको अध्यक्ष गरिबे शेष छन्, जो हाल खजुरा गाउँपालिकाको वडा नम्वर ५ का वडा अध्यक्ष पनि हुन् । माध्यमिक तहको विद्यालय व्यवस्थापन समितिको अध्यक्ष हुनका लागि कम्तीमा एसएलसी वा सो सरहको परीक्षा उत्तीर्ण गरेको हुनुपर्ने शिक्षा ऐन नियमावलीमा उल्लेख गरिएको छ । तर, भानु माध्यमिक विद्यालयको व्यवस्थापन समिति अध्यक्ष शेषले अहिले पालिकास्तरीय आधारभूत तह कक्षा ८ को खुला शिक्षा अन्तर्गत आदर्श माध्यमिक विद्यालय खजुरा परीक्षा केन्द्रबाट परीक्षा दिइरहेका छन् ।

No description available.

भानुका अभिभावकहरुले योग्यता पुगेका ब्यक्तिहरु हुँदाहुँदै योग्यता नपुगेको व्यक्तिलाई गाउँपालिकाबाट दादागिरी शैलीमा अध्यक्ष बनाएको आरोप लगाएका छन् । उनीहरुले योग्यता नपुगेको व्यक्ति विद्यालय व्यवस्थापन समितिको अध्यक्ष बनाइनु गैरकानुनी काम भएको बताए । विद्यालयको शैक्षिक गुणस्तर सुधारमा अयोग्य ब्यक्तिले कुनै योगदान दिन नसक्ने उनीहरुको भनाई छ । खजुरा गाउँपालिका वडा नम्वर ६ उढरापुरका मोहम्मद शकिल खाँले गाउँपालिकाले गैरकानुनी काम गरेको बताउँदै योग्यता नपुगेका अध्यक्षबाट विद्यालयको सुधारमा कुनै अपेक्षा गर्न नसकिने बताए । उढरापुरकै अर्का अभिभावक जय शकिल अहम्मद खान र बद्दाम खान ले योग्यता नपुगेका व्यक्तिलाई तत्काल बर्खास्त गर्नुपर्ने बताए । आदर्श माविका प्राधानाध्यापक राजेन्द्रप्रसाद सापकोटाले परीक्षामा नियमित र खुला शिक्षाका विद्यार्थीहरु सहभागी रहेको बताए । उनले नियमित विद्यालय गएर पढ्न नसक्ने, अलि उमेर पुगेकाहरुका लागि राज्यले खुला शिक्षाको व्यवस्था गरेको बताए । त्यसै अनुरुप शेष पनि परीक्षमा सामेल भएको सापकोटाको भनाई छ ।

गाउँपालिकाका शिक्षा शाखा प्रमुख खगेन्द्रबहादृर मल्लले भने गरिबे शेष भन्ने व्यक्ति भानु माविको अध्यक्ष भएको जानकारी आफूलाई नभएको जिकिर गर्छन् । उनले गरिबे शेष भन्ने व्यक्तिले आफूखुशी स्वयम् अध्यक्ष हुँ भन्दै विद्यालय व्यवस्थापन समिति अध्यक्ष चलाइरहेको दाबी गर्छन । शेष विद्यालय व्यवस्थापन समितिको मनोनित सदस्य मात्र भएको मल्ल बताउँछन् । कानुनी हिसावले शेष विद्यालय व्यवस्थापन समितिको अध्यक्ष नभएको मल्लले दाबी गरे । शेषले जेष्ठ सदस्यताका हैसियतले बैठक बसाउने गरेको आफूले थाहा पाएको भएपनि उनी अध्यक्ष भने नभएको मल्लले वताए । तर, भानु माविको विद्यालय व्यवस्थापन समितिको पदाधिकारी विवरणमा गरिबे शेषलाई निर्वाचित अध्यक्ष भनिएको छ । उनी नै अध्यक्षको भूमिकामा छन् । २०७८ मंसिर २५ गतेदेखि उनी अध्यक्षको भूमिकामा छन् ।

No description available.