जीवन उपयोगी सीप र जलवायु न्याय क्लब (पाठ्यक्रम) सम्बन्धि तालिम सुरु

शिक्षा

गृहपृष्ठ
शिक्षा
जीवन उपयोगी सीप र जलवायु न्याय क्लब (पाठ्यक्रम) सम्बन्धि तालिम सुरु

जीवन उपयोगी सीप र जलवायु न्याय क्लब (पाठ्यक्रम) सम्बन्धि तालिम सुरु

सोमबार, जेठ १९, २०८२ बागेश्वरी पोस्ट

नेपालगञ्ज । बालिका शिक्षा कार्यक्रम सञ्चालित बाँकेको खजुरा गाउँपालिकाका १६ ओटा माध्यमिक विद्यालयका प्रधानाध्यापक र फोकल शिक्षकका लागि तीन दिने तालिम सुरु भएको छ । रुम टु रिडको आर्थिक तथा प्राविधिक सहयोग, खजुरा गाउँपालिकाको सहकार्यमा बास नेपालको आयोजनामा आजदेखि खजुरामा तालिम सुरु भएको हो ।

तालिमको उद्घाटन सत्रमा बोल्दै खजुरा गाउँपालिकाका अध्यक्ष डम्बर बहादुर बिकले रुम टु रिड र बासमार्फत सञ्चालन भएको बालिका शिक्षा कार्यक्रमको उपलब्धि अत्यन्तै सकारात्मक देखिएकाले पालिकाले उक्त कार्यक्रमलाई निरन्तरता दिने योजना अगाडि बढाएको बताए । बालिका शिक्षा कार्यक्रम एक प्रभावकारी कार्यक्रम रहेको बताउँदै कार्यक्रमले बालिकाहरुको जीवनमा सकारात्मक परिवर्तन ल्याएको उनको भनाई थियो । मधेशी, मुस्लिम समुदायका किशोरीमा आएको परिवर्तनले अभिभावकको समेत धारणा सकारात्मक भएको पाइएकाले गाउँपालिकाका १६ वटै माबिमा सञ्चालन गर्न पालिका अगाडि बढेको उनको भनाई थियो ।

यसैगरी उद्घाटन सत्रमा बोल्दै खजुरा गाउँपालिकाका उपाध्यक्ष मञ्जु मल्लले पालिकाको शैक्षिक गुणस्तर सुधारका लागि बालिका शिक्षा कार्यक्रम एक सफल कार्यक्रम भएको बताइन् । खजुरा गाउँपालिका कार्यपालिका सदस्य एवं सामाजिक विकास समिति संयोजक कृष्णा पोखरेलले बिद्यालय अनुगमनको क्रममा बालिकाहरुमा आएको परिवर्तन कार्यक्रमको उपलब्धि मापनको आधार रहेको बताउँदै कार्यक्रमलाई निरन्तर अगाडि बढाउनुपर्नेमा जोड दिइन् ।

बास नेपालका केन्द्रीय अध्यक्ष शिव कुमार वर्माको अध्यक्षतामा भएको तालिमको उद्घाटन सत्रमा बोल्दै शिक्षा शाखा प्रमुख खगेन्द्र बहादुर मल्लले कार्यक्रमको उपलब्धिमा सबै सकारात्मक रहेकाले निरन्तरताको योजना बनाएको बताए । उनले सबै माबिमा जानु चुनौतीसँगै अवसर रहेकाले सबै बिद्यालयहरुले उक्त चुनौतीलाई अवसरमा बदल्न सफल हुने विश्वास ब्यक्त गरे । तालिमको उद्घाटन सत्रमा रुम टु रिडका फिल्ड म्यानेजर दिनेश पोखरेलले तालिमको उद्देश्यमाथि प्रकाश पारेका थिए । उनले बालिका शिक्षा कार्यक्रमलाई अपनत्व स्विकार गर्दै निरन्तरताका लागि अगाडि बढाएकोमा खुसी लागेको बताए ।

बास नेपाल बालिका शिक्षा कार्यक्रम संयोजक हेमराज भट्टले सहजीकरण गरेको उद्घाटन सत्रमा स्वागत बास नेपालका कार्यकारी निर्देशक नमस्कार शाहले गरेका थिए भने धन्यबाद ज्ञापनसहित कार्यक्रमको समापन बास नेपालका केन्द्रीय अध्यक्ष तथा कार्यक्रमका सभाध्यक्ष बर्माले गरेका थिए । तालिममा खजुरा गाउँपालिकाका सबै माबि बिद्यालयका प्रधानाध्यापक र सम्पर्क शिक्षकको सहभागिता रहेको छ ।

जीवन उपयोगी सीप, जीवन उपयोगी सीपको १० तत्वहरुबारे प्रशिक्षित गर्ने र विद्यालयस्तरमा जीवन उपयोगी सीपलाई जारी राख्न सक्षम बनाउने, जलवायु न्याय पाठ्यक्रम किन सान्दर्भिक छ र यस पाठ्यक्रमका सिकाई उद्देश्यहरू के के हुन् बुझ्ने, यस पाठ्यक्रमको प्रभावकारी कार्यान्वयनका लागि जलवायु परिवर्तन सम्बन्धि ज्ञान हासिल गर्ने, निर्देशिकाको सत्रहरुमा रहेको विशेष क्रियाकलापहरुको अवधारणामा स्पष्ट हुने, पाठ्यक्रमको प्रभावकारी कार्यान्वयनका लागि लैङ्गिकता र जलवायु न्यायसम्बन्धि ज्ञान हासिल गर्ने उद्देश्यले तालिमको आयोजना गरिएको हो । तीन दिने तालिमको सहजीकरण रुम टु रिडका जय प्रजापति, दिनेश पोखरेल, निरोज कोइराला, बासका कार्यक्रम संयोजक भट्ट, शोभा भण्डारी, सविता सुनार, जमुना चौधरीले गर्नेछन् ।

प्रकाशित मिति: सोमबार, जेठ १९, २०८२ २०:३८