उच्च शिक्षामा प्रोत्साहन गर्न डुडुवामा एसईई उत्तीर्ण छात्रालाई साइकल वितरण

शिक्षा

गृहपृष्ठ
शिक्षा
उच्च शिक्षामा प्रोत्साहन गर्न डुडुवामा एसईई उत्तीर्ण छात्रालाई साइकल वितरण

उच्च शिक्षामा प्रोत्साहन गर्न डुडुवामा एसईई उत्तीर्ण छात्रालाई साइकल वितरण

शुक्रबार, असार ६, २०८२ बागेश्वरी पोस्ट

नेपालगञ्ज । बाँकेको डुडुवा गाउँपालिकाले छात्रा प्रोत्साहन कार्यक्रम अन्तर्गत एसईई पास गरेका छात्राहरुलाई साइकल वितरण गरेको छ । घरदेखि टाढा बजारसम्म गएर उच्च शिक्षा हासिल गर्न सहजता तथा उत्प्रेरणाका लागि गाउँपालिका अन्तर्गतका सामुदायिक तथा निजी विद्यालयहरुका छात्रालाई साइकल वितरण गरिएको हो ।

२०८० सालमा एसईई पास गरेका गाउँपालिकाका ८ वटा विद्यालयका ४१ जना छात्रालाई साइकल वितरण गरिएको शिक्षा शाखाका स्रोत व्यक्ति राम एकबाल मण्डलले बताए । पालिका कार्यालयमा आयोजित एक समारोहका बीच साइकल वितरण गर्दै गाउँपालिका अध्यक्ष नरेन्द्र कुमार चौधरीले किशोरीहरुलाई उच्च शिक्षा हासिल गर्न प्रोत्साहन गर्ने उद्देश्यले साइकल वितरण गरेको बताए । साइकल पाएपछि उच्च शिक्षा हासिल गर्न टाढा तथा बजारसम्म आउजाउ गर्न मद्दत पुग्ने उनको भनाई छ ।

उहाँले विशेषगरी मधेशी समुदायका किशोरीहरु साधारण कक्षा पढेपछि विभिन्न कारणले उच्च शिक्षा हासिल गर्न नसकेको समस्यालाई यो कार्यक्रमले अन्त्य गर्ने विश्वास व्यक्त गरे । अध्यक्ष चौधरीले शिक्षा भनेको उज्यालोको प्रकाश भएकाले बालबालिकालाई शिक्षातर्फ विशेष ध्यान दिनुपर्नेमा जोड दिँदै पालिकाभित्र संचालित विद्यालयहरुमा शैक्षिक गुणस्तरियताका लागि पहिलो चरणमा आधारभूत विद्यालयलाई सिसी क्यामरामार्फत निगरानी समेत गरिरहेको जानकारी दिए ।

कार्यक्रममा उपाध्यक्ष शाहिदा बानो, वडा अध्यक्षहरु पटेश्वर कुर्मी, आमोद तिवारी, प्रमुख प्रशासकीय अधिकृत अशोक कुमार पाण्डेय, विभिन्न विद्यालयका शिक्षक, अभिभावक, विद्यार्थी लगायतको सहभागिता रहेको थियो । गाउँपालिकाले हरेक वर्ष एसईई पास गर्ने छात्राहरुलाई नियमित रुपमा साइकल वितरण गर्दै आएको छ ।

प्रकाशित मिति: शुक्रबार, असार ६, २०८२ २०:२७

प्रतिक्रिया दिनुहोस्