नेपालगञ्जका निजी विद्यालयले समेत 'बृहत्तर विद्यालय सुरक्षा योजना' बनाउने

शिक्षा

गृहपृष्ठ
शिक्षा
नेपालगञ्जका निजी विद्यालयले समेत 'बृहत्तर विद्यालय सुरक्षा योजना' बनाउने

नेपालगञ्जका निजी विद्यालयले समेत 'बृहत्तर विद्यालय सुरक्षा योजना' बनाउने

मंगलबार, साउन १३, २०८२ गौरब गिरी

नेपालगञ्ज । नेपालगञ्ज उपमहानगरपालिकाका निजी विद्यालयहरुले समेत बृहत्तर विद्यालय सुरक्षा योजना बनाउने भएका छन् । नेपालगञ्ज उपमहानगरपालिकाले आज आयोजना गरेको निजी विद्यालयसंगको छलफल कार्यक्रममा विपद् जोखिम न्यूनीकरणका लागि योजना बनाउने सहभागीहरुले बताएका छन् । नेपालगञ्ज उपमहानगरपालिकामा सञ्चालित सहरी विपद् तथा भूकम्पीय पूर्व तयारी परियोजना (सुपर ।।) को प्राविधिक सहयोगमा कार्यक्रम गरिएको हो ।

कार्यक्रममा बोल्दै नेपालगञ्ज उपमहानगरपालिका विपद् समिति संयोजक समिर प्रताप सिंहले विपद्जन्य जोखिम न्यूनीकरणमा निजी विद्यालयहरुलाई समेत सबल र सक्षम बनाउन आवश्यक रहेको बताए । शिक्षा महाशाखा प्रमुख गोर्ख बहादुर थापाले विपद्मा विद्यालयले अपनाउनुपर्ने सुरक्षा रणनीतिबारे विद्यालयले फोकल शिक्षक तोकेर आर्जन गरेको ज्ञान र सीप पूर्व तयारी, प्रतिकार्य र व्यवस्थापनमा उपयोग गर्न आग्रह गरे । महाशाखा प्रमुख थापाले भूकम्प लगायत अन्य विपद्का घटनाहरुमा विद्यालयले ध्यान दिनुपर्ने र पूर्व तयारी गर्नुपर्ने विषयहरुमा केन्द्रित रहेर सममुदायिक विद्यालयसंगै निजी विद्यालय समेतको सहभागितामा प्रशिक्षण कार्यक्रम सञ्चालन गरेको बताए ।

आपतकालीन कार्यसञ्चालन केन्द्रका सूचना व्यवस्थापन अधिृकत रुपन ज्ञवालीले तालिमपछि सवै निजी विद्यालयले वृहत्तर विद्यालय योजना बनाउने साथै विपद् जोखिम न्यूनीकरणका लागि कृत्रिम घटना अभ्यास गर्ने सहमति भएको जानकारी दिए । बृहत्तर विद्यालय सुरक्षा सम्बन्धि योजना तयार गर्ने तथा विद्यालयमा सचेतना प्रबद्र्धन गर्ने उद्देश्य रहेको प्रशिक्षण कार्यक्रममा ३ दर्जन निजी विद्यालयका प्रमुख तथा प्रतिनिधिको सहभागिता रहेको थियो । सुपरको सहयोगमा नेपालगञ्जमा संचालित ३० सामुदायिक विद्यालयमा बृहत्तर सुरक्षा योजना यसअघि नै निर्माण भइरहेको महाशाखाले जनाएको छ ।

युरोपियन युनियनको सहयोगमा नेपालगञ्ज उपमहानगरपालिकामा सुपर सञ्चालनमा रहेको छ । युरोपियन युनियनको आर्थिक सहयोग तथा युएनडिपी, युनिसेफ, युएन ओमन र एचआईको साझेदारी एवम् सिडिएम नेपालको प्राविधिक सहयोगमा नेपालगञ्ज उपमहानगरपालिकामा सञ्चालित सुपर कार्यक्रमले विपद् पूर्व तयारी र प्रतिकार्यका लागि काम गरिरहेको छ ।

प्रकाशित मिति: मंगलबार, साउन १३, २०८२ २१:२०

प्रतिक्रिया दिनुहोस्