आईटी पढ्दै कमाउँदै महेन्द्र बहुमुखी क्याम्पसका विद्यार्थी

शिक्षा

गृहपृष्ठ
शिक्षा
आईटी पढ्दै कमाउँदै महेन्द्र बहुमुखी क्याम्पसका विद्यार्थी

आईटी पढ्दै कमाउँदै महेन्द्र बहुमुखी क्याम्पसका विद्यार्थी

बुधबार, साउन २८, २०८२ बागेश्वरी पोस्ट

घोराही, दाङ । महेन्द्र बहुमुखी क्याम्पस दाङमा वि.एस.सी. सिएसआईटी र बि.सि.ए.मा अध्ययनरत विद्यार्थीहरूले अध्ययनसँगै कमाउने अवसर पाएका छन् । प्राविधिक सीप र उद्यमशील सोचको संयोजनमार्फत उनीहरूले नयाँ–नयाँ परियोजना निर्माण गरी व्यवहारिक अनुभव बटुलिरहेका छन् ।

स्वतन्त्र विद्यार्थी युनियन, महेन्द्र बहुमुखी क्याम्पस दाङको आयोजना एवं क्याम्पस प्रमुख डा. नारायण पन्थीको प्रमुख आतिथ्यतामा बुधबार आयोजना गरिएको पत्रकार सम्मेलनमा विद्यार्थीहरूले आफ्ना उपलब्धिहरू प्रस्तुत गरेका थिए ।

वि.एस.सी. सिएसआईटी तेस्रो सेमेस्टरकी निरुता आचार्यले ‘लबलाइन्स’ नामक मोबाइल एप विकास गरी गुगल प्ले स्टोरमा सार्वजनिक गरेको जानकारी दिएकी थिइन् । यसले उनलाई नयाँ चुनौतीहरू स्वीकार गर्न प्रेरित गरेको अनुभव सुनाएकी थिइन् ।

वि.एस.सी. सिएसआईटी छैटौं सेमेस्टरका आयुस अधिकारीले ‘फाइनान्स एफ’ एप निर्माण गरेको र सातौं सेमेस्टरका जगदिश पौडेलले ‘प्रश्नपत्रको संगालो – सिएसआईटी प्रो’ नामक एप लन्च गरेको जानकारी दिए । यी एपहरू हाल १०० भन्दा बढी सक्रिय प्रयोगकर्ताले प्रयोग गरिरहेका उनीहरुको भनाई थियो ।

त्यस्तै, वि.एस.सी. सिएसआईटी छैटौं सेमेस्टरका जगदिश वली, निर्देश तिवारी, कमल भट्टराई तथा बि.सि.ए. चौथो सेमेस्टरका संजय कार्कीले वेबसाइट डिजाइनमार्फत आम्दानी गरिरहेको बताएका थिए । विद्यार्थीहरूले यस किसिमको व्यवहारिक अवसर प्रदान गरेकोमा क्याम्पस प्रशासन, स्वतन्त्र विद्यार्थी युनियन र सिएसए क्लबलाई धन्यवाद समेत ज्ञापन गरेका थिए । क्याम्पस स्ववियु सभापति दिपेश डिसीको अध्यक्षतामा भएको कार्यक्रममा शिक्षक कृष्णदेव थापाले स्वागत मन्तव्य राखेका थिए भने कार्यक्रमको सहजीकरण सचिव सागर पण्डितले गरेका थिए ।

प्रकाशित मिति: बुधबार, साउन २८, २०८२ २१:१३

प्रतिक्रिया दिनुहोस्