वादी समुदायका महिलालाई स्वरोजगारतर्फ उन्मुख बनाउन 'डलकुशन' निर्माण तालिम

अर्थ

गृहपृष्ठ
अर्थ
वादी समुदायका महिलालाई स्वरोजगारतर्फ उन्मुख बनाउन 'डलकुशन' निर्माण तालिम

वादी समुदायका महिलालाई स्वरोजगारतर्फ उन्मुख बनाउन 'डलकुशन' निर्माण तालिम

शुक्रबार, असार २६, २०८३ बागेश्वरी पोस्ट

नेपालगञ्ज । वादी समुदायका महिलालाई सीप, स्वरोजगार र आयआर्जनसँग जोड्ने उद्देश्यले सञ्चालन गरिएको १५ दिने मागमा आधारित डलकुशन निर्माण तालिम सम्पन्न भएको छ । घरेलु तथा साना उद्योग कार्यालय बाँकेको आयोजनामा नेपालगञ्जमा सम्पन्न तालिम समापन कार्यक्रममा कार्यालयका वरिष्ठ अधिकृत पुष्कर सिंह ठकुरीको अध्यक्षता तथा लुम्बिनी प्रदेश सभा सदस्य सुशिला नेपालीको प्रमुख आतिथ्यता रहेको थियो ।

समापन समारोहलाई सम्बोधन गर्दै प्रदेश सभा सदस्य नेपालीले वादी समुदायलाई परम्परागत पेशामा मात्र सीमित नराखी सीप, उद्यमशीलता र आर्थिक आत्मनिर्भरतासँग जोड्नु आजको आवश्यकता भएको बताइन् । उनले सीपमूलक तालिमले समुदायका महिलामा आत्मविश्वास बढाउनुका साथै आफ्नै गाउँ–समाजमै रोजगारी सिर्जना गर्न महत्वपूर्ण भूमिका खेल्ने विश्वास व्यक्त गरिन् ।

उनले लुम्बिनी प्रदेशले सीप विकास, उद्यम प्रवर्द्धन र आयआर्जनका कार्यक्रमलाई प्राथमिकतामा राखेको उल्लेख गर्दै वादी समुदायका लागि आवश्यक बजेट विनियोजन गर्न आफूले विशेष पहल गरेको बताइन् । तालिमबाट सिकेको ज्ञानलाई व्यवहारमा उतारेर सफल उद्यमी बन्न प्रशिक्षार्थीलाई आग्रह गर्दै आवश्यक परे आगामी दिनमा पनि सहयोग र समन्वय गर्न तयार रहेको प्रतिबद्धता व्यक्त गरिन् ।

कार्यक्रमका अध्यक्ष ठकुरीले मागमा आधारित तालिमले रोजगारी र उद्यम विकासमा योगदान पुग्ने बताए । सीप सिकेर मात्र नभई त्यसलाई व्यवसायमा रूपान्तरण गर्न सके आर्थिक अवस्था सुधार हुने उल्लेख गर्दै कार्यालयले आगामी दिनमा पनि लक्षित समुदायका लागि यस्ता कार्यक्रमलाई निरन्तरता दिने जानकारी दिए । नेपाल पत्रकार महासंघ बाँकेका अध्यक्ष नवीन गिरीले सीपमूलक तालिमलाई उत्पादन र बजारसँग जोड्न सके मात्र यसको वास्तविक उपलब्धि देखिने बताए । उनले तालिमपछि उत्पादित सामग्रीको बजारीकरण, ब्रान्डिङ र प्रचारप्रसारमा सम्बन्धित निकायले विशेष ध्यान दिनुपर्ने धारणा राख्दै सञ्चार माध्यमले स्थानीय उत्पादनको प्रवर्द्धनमा सकारात्मक भूमिका निर्वाह गर्ने बताए ।

कमिट नेपालका महासचिव प्रकाश नेपालीले वादी समुदायको सामाजिक तथा आर्थिक सशक्तिकरणका लागि सरकारी निकाय, नागरिक समाज र समुदायबीच सहकार्य आवश्यक रहेको बताए । उनले तालिमबाट प्राप्त सीपलाई दिगो आम्दानीको स्रोत बनाउन सबै पक्षको निरन्तर साथ र सहयोग आवश्यक पर्ने धारणा व्यक्त गरे । कार्यक्रममा तालिमका प्रशिक्षक देवी पुन र सिर्जना नेपाली, प्रशिक्षार्थी शान्ता नेपालीले पनि बोलेका थिए ।

कार्यक्रममा प्रदेश सभा सदस्य नेपालीले तालिम सफलतापूर्वक सम्पन्न प्रशिक्षार्थीलाई प्रमाणपत्र वितरण गरेकी थिइन् । घरेलु तथा साना उद्योग कार्यालय बाँकेकी उद्यम विकास सहजकर्ता मीना पाण्डेका अनुसार तालिममा वादी समुदायका २० जना प्रशिक्षार्थी सहभागी थिए । प्रदेश सभा सदस्य नेपालीको पहलमा लुम्बिनी प्रदेश सरकारको बजेटमार्फत उक्त तालिम सञ्चालन गरिएको हो ।

प्रकाशित मिति: शुक्रबार, असार २६, २०८३ २०:२३

प्रतिक्रिया दिनुहोस्