बाँकेमा ८४ प्रतिशत धान रोपाइँ सम्पन्न

अर्थ

गृहपृष्ठ
अर्थ
बाँकेमा ८४ प्रतिशत धान रोपाइँ सम्पन्न

बाँकेमा ८४ प्रतिशत धान रोपाइँ सम्पन्न

सोमबार, साउन ११, २०८३ बागेश्वरी पोस्ट

नेपालगञ्ज । बाँके जिल्लामा यस वर्षको धान रोपाइँ उल्लेखनीय रूपमा अघि बढेको छ । हालसम्म जिल्लाको कुल धान खेतीयोग्य क्षेत्रफलमध्ये ८४ प्रतिशत अर्थात् २८ हजार ३ सय ७५ हेक्टर क्षेत्रफलमा रोपाइँ सम्पन्न भएको कृषि ज्ञान केन्द्र बाँकेले जनाएको छ । जिल्लामा करिब ३३ हजार ७ सय ८० हेक्टर क्षेत्रफलमा धान खेती हुँदै आएको छ ।

कृषि ज्ञान केन्द्र बाँकेका प्रमुख डा. विनोद घिमिरेका अनुसार पछिल्ला दिनमा परेको वर्षाले रोपाइँले तीव्र गति लिएको हो । सिक्टा सिंचाइ आयोजनाको कमाण्ड क्षेत्र तथा अन्य सिंचाइ सुविधा पुगेका स्थानमा किसानले रोपाइँ सकिसकेका छन् । तर, आकाशे पानीमा निर्भर रहेका केही क्षेत्रमा पर्याप्त वर्षा नहुँदा रोपाइँ अझै बाँकी रहेको उनले बताए ।

उनका अनुसार बाँकेमा सामान्यतया असारको दोस्रो सातादेखि धान रोपाइँ सुरु भई भदौको पहिलो सातासम्म चल्ने गर्दछ । यस वर्ष मनसुन ढिलो सक्रिय भएकाले रोपाइँ पनि केही ढिलो सुरु भए पनि पछिल्ला वर्षाले किसानलाई राहत दिएको छ ।

किसानहरूका अनुसार केही दिनयताको निरन्तर वर्षापछि खेतमा पर्याप्त चिस्यान पुगेको छ, जसका कारण रोपाइँको काम द्रुत गतिमा भइरहेको छ । मौसमले साथ दिएर नियमित वर्षा भइरहे साउन महिनाभित्रै बाँकी क्षेत्रहरूमा पनि धान रोपाइँ सम्पन्न हुने अपेक्षा गरिएको कृषि ज्ञान केन्द्रले जनाएको छ ।

प्रकाशित मिति: सोमबार, साउन ११, २०८३ २०:४२

प्रतिक्रिया दिनुहोस्