नेपालगञ्जमा ‘अपलिफ्ट’ परियोजना सुरु

स्थानीय

गृहपृष्ठ
स्थानीय
नेपालगञ्जमा ‘अपलिफ्ट’ परियोजना सुरु

नेपालगञ्जमा ‘अपलिफ्ट’ परियोजना सुरु

बिहीबार, भदौ १८, २०८३ बागेश्वरी पोस्ट

नेपालगञ्ज । नेपालगञ्जमा किशोरकिशोरी तथा युवाको सीप, क्षमता र भविष्यका लागि तयारीमा केन्द्रित ‘अपलिफ्ट’ परियोजना (UPLIFT PROJECT) सुरु भएको छ । सेभ द चिल्ड्रेनको साझेदारीमा सामाजिक विकास मञ्च बाँके (SDF) ले परियोजना सञ्चालन गर्न लागेको हो ।

परियोजनाबारे सरोकारवालालाई जानकारी गराउने उद्देश्यले बिहीबार नेपालगञ्जमा परिचयात्मक बैठक आयोजना गरिएको थियो । बैठकमा परियोजनाका उद्देश्य, लक्षित समूह, सञ्चालन हुने क्षेत्र, प्रमुख गतिविधि तथा अपेक्षित उपलब्धिबारे जानकारी गराइएको थियो ।

परियोजना संयोजक राम श्रेष्ठका अनुसार सिकाइ, नवप्रवर्तन, भविष्यका लागि तयारी तथा प्राविधिक रूपान्तरणमार्फत युवाको उत्थान गर्ने उद्देश्यले परियोजना सञ्चालन गर्न लागिएको हो । परियोजना नेपालगञ्ज उपमहानगरपालिकाका ६ वटा वडामा सञ्चालन हुनेछ ।

श्रेष्ठका अनुसार परियोजनाका लागि नेपालगञ्ज उपमहानगरपालिकाका वडा नम्बर २, ८, १२, १३, २१ र २२ छनोट भएका छन् । साढे दुई वर्ष सञ्चालन हुने परियोजना अन्तर्गत १६ देखि २४ वर्ष उमेर समूहका किशोरकिशोरी तथा युवासँग विभिन्न कार्यक्रम सञ्चालन गरिनेछ ।

परियोजनाले युवामा सिकाइ तथा सीप विकाससँगै नवप्रवर्तन, प्रविधिको प्रयोग र भविष्यका अवसरका लागि आवश्यक तयारीमा सहयोग गर्ने लक्ष्य लिएको छ । परिचयात्मक बैठकमा परियोजनाका आगामी गतिविधि तथा कार्यान्वयन प्रक्रियाबारे समेत जानकारी गराइएको थियो ।

सरोकारवालाको सहभागितामा सम्पन्न बैठकमा नेपालगञ्ज उपमहानगरपालिकाका निमित्त प्रमुख प्रशासकीय अधिकृत गोर्खबहादुर थापा, सामाजिक विकास मञ्चका अध्यक्ष चम्प सिंह थापा मगर लगायतले मन्तव्य व्यक्त गरेका थिए ।

प्रकाशित मिति: बिहीबार, भदौ १८, २०८३ १३:५९

प्रतिक्रिया दिनुहोस्