नेपालगञ्जमा 'अन्तरपुस्ता वित्तीय सुधारसम्बन्धी परामर्श कार्यशाला’ सम्पन्न

अर्थ

गृहपृष्ठ
अर्थ
नेपालगञ्जमा 'अन्तरपुस्ता वित्तीय सुधारसम्बन्धी परामर्श कार्यशाला’ सम्पन्न

नेपालगञ्जमा 'अन्तरपुस्ता वित्तीय सुधारसम्बन्धी परामर्श कार्यशाला’ सम्पन्न

बिहीबार, भदौ २५, २०८३ बागेश्वरी पोस्ट

नेपालगन्ज । उज्वल थापा फाउन्डेसनले ‘आर्थिक पारदर्शिता र जवाफदेहिताका लागि अन्तरपुस्ता नागरिक समाज सहभागिता’ परियोजना अन्तर्गत एक दिने ‘अन्तरपुस्ता वित्तीय सुधारसम्बन्धी परामर्श कार्यशाला’ बिहीबार नेपालगञ्जमा सम्पन्न गरेको छ ।

सार्वजनिक वित्तीय पारदर्शिता, जवाफदेहिता, सूचनाको हक, नागरिक निगरानी, सार्वजनिक खरिद, विकास आयोजना व्यवस्थापन तथा समावेशी बजेट प्रक्रिया लगायतका विषयमा गहन छलफल गरी व्यवहारिक सुधारका लागि सुझाव संकलन गर्ने उद्देश्यले कार्यशाला आयोजना गरिएको परियोजना निर्देशक विवश पौडेलले बताए ।

कार्यशालामा लुम्बिनी, कर्णाली र सुदूरपश्चिम प्रदेशका प्रदेशसभा सदस्य, स्थानीय तहका जनप्रतिनिधि, नागरिक समाजका अगुवा, युवा अभियन्ता, युवा प्रतिनिधि तथा विषयगत विज्ञसहित २० जना सरोकारवालाको सहभागिता रहेको फाउन्डेसनकी साधना राईले जानकारी दिइन् ।

वित्तीय शासनलाई थप पारदर्शी, जवाफदेही र नागरिकमैत्री बनाउन विभिन्न पुस्ताका नागरिक तथा सरोकारवालाबीच संवाद र सहकार्य आवश्यक रहेको भन्दै फाउन्डेसनले कार्यशालामार्फत प्राप्त सुझावलाई व्यवहारिक सुधारका लागि उपयोग गर्ने जनाएको छ ।

कार्यशालामा सार्वजनिक स्रोतको प्रभावकारी उपयोग, बजेट निर्माण तथा कार्यान्वयनमा नागरिक सहभागिता र निगरानी, सार्वजनिक खरिद प्रक्रियामा पारदर्शिता तथा विकास आयोजनाको प्रभावकारी व्यवस्थापनका विषयमा समेत छलफल भएको थियो । आशुतोष तिवारी र रक्षा बमले सहजीकरण गरेको कार्यशालामा लुम्बिनी प्रदेश सरकारका निवर्तमान सामाजिक विकास मन्त्री जन्मजय तिमिल्सिना, कर्णाली प्रदेश सभा सदस्य देवेन्द्र शाही लगायत अतिथिको रुपमा सहभागी थिए ।

त्यसक्रममा बोल्दै लुम्बिनी प्रदेशसभा सदस्य एवम् निवर्तमान मन्त्री तिमिल्सिना र कर्णाली प्रदेश सभा सदस्य शाहीले बजेट निर्माण र कार्यान्वयनमा नागरिक सहभागिता, साझेदारी र खबरदारी निरन्तर भइरहनुपर्ने आवश्यकतामा जोड दिए ।

प्रकाशित मिति: बिहीबार, भदौ २५, २०८३ २१:२६

प्रतिक्रिया दिनुहोस्