प्रधानमन्त्री कप महिला भलिबलको सातौं संस्करण फागुन २१ देखि

स्थानीय

गृहपृष्ठ
स्थानीय
प्रधानमन्त्री कप महिला भलिबलको सातौं संस्करण फागुन २१ देखि

प्रधानमन्त्री कप महिला भलिबलको सातौं संस्करण फागुन २१ देखि

मंगलबार, फागुन ४, २०७७ बागेश्वरी पोस्ट

नेपालगन्ज । नेपालगन्जमा ७ औं प्रधानमन्त्री कप महिला भलिबल प्रतियोगिता हुने भएको छ ।

बाँके जिल्ला भलिबल संघ र क्रियटिभ ह्यान्ड्सको ब्यबस्थापनमा यही फागुन २१ देखि २५ गतेसम्म प्रधानमन्त्री कप महिला भलिबल प्रतियोगिता हुन लागेको बाँके जिल्ला भलिबल संघले आज पत्रकार सम्मेलन मार्फत् जानकारी दिएको छ ।

प्रतियोगितामा ७ वटा टोली सहभागी हुने भएका छन् । ७ टोली मध्ये नेपालका ५ वटा तथा भारत र बंगलादेशका १-१ टोली सहभागी हुने आयोजकले जनाएको छ । प्रतियोगितामा नेपाली टोलीमा नेपाली सेना, नेपाल प्रहरी, एपीएफ र न्यु डायमण्ड क्लब सहभागी हुनेछन् भने भारतको पुरानै रेल्वे क्लब र बंगलादेशबाट कुन टोली आउने भन्ने एकिन भने नभएको संघले जनाएको छ ।

७ औं संस्करणमा महिला सशक्तिकरणमा मद्दत पुग्ने उद्देश्यका साथ प्रदेशसभा सदस्य कृष्णा केसी नमुनाको संयोजकत्त्व तथा नेपालगन्ज उपप्रमुख उमा थापा मगर सहसंयोजक रहने गरी बाँकेका सबै स्थानीय तहका उपप्रमुख टोलीमा आबद्ध रहेकाले प्रधानमन्त्री कप महिला भलिबल प्रतियोगिता अन्य प्रतियोगिता भन्दा फरक रहेको संघको भनाई छ । यस बर्षको प्रतियोगिताको पुरस्कार राशी भने बढाइएको आयोजकले जानकारी दिएको छ । बढाइएको पुरस्कार राशी भने केही दिनपछि सार्बजनिक गरिने आयोजकले बताएको छ ।

कोरोना महामारी अझै नसकिएकाले प्रतियोगितामा स्वास्थ्य मापदण्डलाई ख्याल गर्दै संचालन गरिने बाँके जिल्ला भलिबल संघले बताएको छ ।

आज गरिएको पत्रकार सम्मेलनमा प्रदेशसभा सदस्य नमुना, नेपालगन्जकी उपप्रमुख थापामगर, कोहलपुरकी उपप्रमुख सन्जु कुमारी थारु, राप्तीसोनारी गाउँपालिकाकी उपप्रमुख धनी कुमारी खत्री, खजुरा गाउँपालिकाकी उपप्रमुख एकमाया विक, बैजनाथ गाउँपालिकाकी उपप्रमुख शारदा रेग्मी विक, जानकी गाउँपालिकाकी उपप्रमुख भूमीसरा धिताल लगायत नेपाल भलिबल संघका केन्द्रिय सचिब भिम ओली, बाँके जिल्ला भलिबल संघका अध्यक्ष टिएस ठकुरी र पत्रकारहरुको उपस्थिति रहेको थियो ।

प्रकाशित मिति: मंगलबार, फागुन ४, २०७७ २१:२२