भेरीमा डाक्टर र नर्समाथि हातपात गरेको आरोप खेपेका तीन जना ५० हजार धरौटी बुझाएर छुटे

स्थानीय

गृहपृष्ठ
स्थानीय
भेरीमा डाक्टर र नर्समाथि हातपात गरेको आरोप खेपेका तीन जना ५० हजार धरौटी बुझाएर छुटे

भेरीमा डाक्टर र नर्समाथि हातपात गरेको आरोप खेपेका तीन जना ५० हजार धरौटी बुझाएर छुटे

आइतबार, असार ६, २०७८ बागेश्वरी पोस्ट

बाँके जिल्ला अदालत

नेपालगन्ज । नेपालगन्जस्थित भेरी अस्पतालमा डाक्टर र नर्समाथि हातपात गरेको आरोप खेपेका दाङका तीन जना जनही ५० हजार धरौटी बुझाएर छुटेका छन् ।

बाँके जिल्ला अदालतका न्यायाधीश श्यामसुन्दर अधिकारीको एकल इजलासले अस्पतालका डाक्टर/नर्समाथि हातपात गरेको अभियोगमा थुनामा रहँदै आएका तुलसीपुरका मानबहादुर रावत, भरत रावत र लोकराज रावतलाई जनही ५०/५० हजार धरौटीमा छोड्न आदेश दिएको हो । बाँके जिल्ला अदालतका श्रेष्तेदार तीर्थ भट्टले तोकिएको धरौटी बुझाएर तीनै जना आज रिहा भएको जानकारी दिनुभयो ।

गत जेठ १३ गते बेलुकी ८ बजे तुलसीपुर ११ उरहरीका ५२ वर्षीय कोरोना संक्रमित बोल्दै गरेका विरामी डिल्ली बहादुर रावतलाई जबर्जस्ती भेन्टिलेटरमा सार्ने क्रममा मृत्यु भएको भन्दै मृतकका आफन्त आक्रोशित भएपछि स्थिति तनावपूर्ण बनेको थियो । अस्पतालका डाक्टर र नर्सहरू आक्रमणको विरोधमा आन्दोलनमा उत्रिएपछि सोही दिन राति प्रहरीले उनीहरू तीन जनालाई पक्राउ गरी थुनामा राख्दै आएको थियो ।

घटनापछि सहायक प्रमुख जिल्ला अधिकारीको नेतृत्वमा छानबिन समिति गठन गरिएको थियो । उक्त समितिले घटनाको ५ दिनपछि २५ पृष्ठ लामो प्रतिवेदन बुझाएको थियो ।

प्रकाशित मिति: आइतबार, असार ६, २०७८ १९:१६

प्रतिक्रिया दिनुहोस्