राप्तीसोनारीमा फेरि दुःखद् नियतिः बाघले अर्को ज्यान लियो

स्थानीय

गृहपृष्ठ
स्थानीय
राप्तीसोनारीमा फेरि दुःखद् नियतिः बाघले अर्को ज्यान लियो

राप्तीसोनारीमा फेरि दुःखद् नियतिः बाघले अर्को ज्यान लियो

शनिबार, पुस २४, २०७८ बागेश्वरी पोस्ट

नेपालगञ्ज । बाँकेको राप्तीसोनारीमा बाघको आक्रमणबाट फेरि एक जनाको मृत्यु भएको छ । राप्तीसोनारी ६ हब्रहवाकी ३० बर्षीया चाँदनी थारुको आज बाघको आक्रमणबाट मृत्यु भएको हो । दाउरा काट्न जंगल गएकी थारुलाई बाघले आक्रमण गरेपछि उनको मृत्यु भएको हो । बाघको आक्रमणबाट विहिबार मात्र राप्तीसोनारी ४ प्रसहवाकी ५२ बर्षीया लिला विष्टको मृत्यु भएको थियो ।

यसअघि शुक्रबार पनि राप्तीसोनारी ५ का बमबहादुर पुन बाघको आक्रमणबाट जोगिन सफल भएका थिए । तर, बाघले बाख्रामाथि आक्रमण गरेको थियो । बाघले एउटा बाख्रा मारेको थियो । राप्तीसोनारीमै बुधबार पनि जंगलमा पात टिप्न गएका महिलालाई पाटेबाघले आक्रमण गरेको थियो । राप्तीसोनारी गाउँपालिका वडा नम्बर ४ बैजापुर नयाँ बस्तीकी ३० बर्षीया महिला दुर्गा थारुलाई बुधबार बिहान बाघले आक्रमण गरेको थियो । बाघको आक्रमणमा परेपनि उनी बाँच्न सफल भएकी थिइन् ।

केही दिन अघि पनि राप्तीसोनारी ५ र ६ को जंगलमा एक जना शिक्षकलाई बाघले झम्टिएको थियो । मोटरसाइकलमा सवार उनी बाँच्न सफल भएका थिए । आजको घटनासंगै बाघले तीन महिनाको अवधिमा बाँकेको राप्तीसोनारी र नरैनापुरमा ४ जनाको ज्यान लिइसकेको छ । यी घटना दोहोरिरहेपछि राप्तीसोनारीमा त्रास बढेको छ । स्थानीयहरु त्रसित बनेका छन् ।

प्रकाशित मिति: शनिबार, पुस २४, २०७८ १३:५३

प्रतिक्रिया दिनुहोस्