आगामी आर्थिक बर्षको कार्यक्रम बजेट निर्माणमा जुट्यो नार्क

समाचार

गृहपृष्ठ
समाचार
आगामी आर्थिक बर्षको कार्यक्रम बजेट निर्माणमा जुट्यो नार्क

आगामी आर्थिक बर्षको कार्यक्रम बजेट निर्माणमा जुट्यो नार्क

सोमबार, माघ १५, २०८० बागेश्वरी पोस्ट

नेपालगञ्ज । नेपाल कृषि अनुसन्धान परिषद् (नार्क) आगामी आर्थिक बर्ष २०८१/८२ को कार्यक्रम बजेट निर्माणमा जुटेको छ । नार्क केन्द्रीय कार्यालय योजना महाशाखाको समन्वयमा प्रदेशस्थित निर्देशनालयहरुको आयोजनामा सञ्चालन हुने गरी तय गरिएको बजेट तर्जुमा गोष्ठी विभिन्न प्रदेशहरुमा एक साथ सम्पन्न भएको हो ।

जस अन्तर्गत लुम्बिनी, कर्णाली र सूदूरपश्चिम प्रदेशमा अवस्थित कार्यालयहरुको कार्यक्रम बजेट गोष्ठी माघ १४ र १५ गते कृषि अनुसन्धान निर्देशनालय, लुम्बिनी प्रदेश, खजुरा, बाँकेको आयोजनामा सम्पन्न भएको छ । बजेट कार्यक्रम गोष्ठीसंगै चालू आर्थिक बर्ष २०८०/८१ को दोस्रो त्रैमासिक एवं अर्धवार्षिक प्रगति समीक्षा गोष्ठी एकै साथ सञ्चालन भएका थिए । ३ ओटा प्रदेशका ११ वटा कार्यालयहरुले चालू आर्थिक बर्षको दोस्रो त्रैमासिक प्रगति र आगामी आर्थिक बर्षको लागि प्रस्तावित बजेट कार्यक्रमको विवरण प्रस्तुत गरेको निर्देशनालयका सूचना अधिकारी रविन गिरीले जानकारी दिए ।

कृषि अनुसन्धान निर्देशनालय खजुराका निर्देशक डा. समीद अहमदको अध्यक्षता, नार्कका प्रशासन निर्देशक नवीन प्रकाश पौडेलको प्रमुख आतिथ्यता र योजना महाशाखा प्रमुख डा. टेक प्रसाद गोतामेको विशिष्ट आतिथ्यतामा सम्पन्न उक्त गोष्ठीमा कर्णाली र सुदूरपश्चिम प्रदेश निर्देशनालयका निर्देशक, अनुसन्धान कार्यक्रमका संयोजक, विभिन्न अनुसन्धान केन्द्रका प्रमुख, वरिष्ठ वैज्ञानिकहरु, वैज्ञानिकहरु, अधिकृतहरु, प्राविधिकहरु लगायतको उपस्थिति रहेको थियो ।

May be an image of 5 people, dais and text

नार्कको बजेट कार्यक्रम तर्जुमा एवं अनुसन्धान परियोजना निर्माण प्रक्रियाका महत्त्वपूर्ण चरणहरु मध्ये गाउँ स्तरीय योजना बैठक, प्रादेशिक कृषि प्राविधिक कार्य समूह बैठक र बाली/बस्तु कार्य समूह बैठक यसअघि नै सम्पन्न भइसकेको सूचना अधिकारी गिरीले बताए ।

नार्कले वैज्ञानिक ढंगबाट सहभागितामूलक पद्धति अपनाई राष्ट्रिय आवश्यकता र किसानको समस्यामा आधारित भई आफ्ना अनुसन्धान कार्यक्रम तय गर्दै आएको छ ।

May be an image of 10 people, dais and text May be an image of 4 people, dais and text