सरकारले आठ महिनाका लागि देशभर जग्गा कित्ताकाट पुनः खुला गर्‍यो

अर्थ

गृहपृष्ठ
अर्थ
सरकारले आठ महिनाका लागि देशभर जग्गा कित्ताकाट पुनः खुला गर्‍यो

सरकारले आठ महिनाका लागि देशभर जग्गा कित्ताकाट पुनः खुला गर्‍यो

शुक्रबार, कात्तिक २८, २०८२ बागेश्वरी पोस्ट

काठमाडौँ । सरकारले भू–उपयोगसम्बन्धी नियमावली संशोधन गर्दै करिब आठ महिनाका लागि देशभर जग्गाको कित्ताकाट पुनः खुला गरेको छ । नयाँ संशोधन अनुसार, भू–उपयोग वर्गीकरण नगरेका स्थानीय तहका लागि कित्ताकाट रोक्ने मिति एक वर्षपछि सारिएको हो ।

यसअघि नियमावलीमा २०८२ असार मसान्तपछि वर्गीकरण नभएका स्थानीय तहमा कित्ताकाट प्रतिबन्ध लाग्ने व्यवस्था थियो, जसको प्रभाव करिब ५०० स्थानीय तहमा परेको थियो । यसले घरजग्गा कारोबारदेखि राजस्व संकलनसम्ममा प्रत्यक्ष असर परेको थियो ।

संशोधित प्रावधान अनुसार अब २०८३ असार मसान्तसम्म देशभर कित्ताकाट गर्न सकिनेछ । भू–उपयोग वर्गीकरण पूरा गरिसकेका स्थानीय तहमा भने पहिलेझैँ निरन्तररूपमा कित्ताकाट हुने व्यवस्था यथावत रहनेछ ।

सरकारले बाँकी स्थानीय तहलाई तोकिएको समयभित्र भू–उपयोग वर्गीकरण पूरा गर्न निर्देश दिएको छ। तोकिएको समयभित्र वर्गीकरण सम्पन्न नभए पुनः कित्ताकाट बन्द हुने चेतावनी पनि नियमावलीले दिएको छ ।

देशभर ७५३ स्थानीय तह रहेकामा करिब दुई तिहाईमा रोकिएका कारण यसअघि घरजग्गा कारोबार सुस्त बनेको थियो । नयाँ निर्णयले यस क्षेत्रमा केही सहजता आउने तथा बजारमा चलायमानता बढ्ने अपेक्षा गरिएको छ ।

प्रकाशित मिति: शुक्रबार, कात्तिक २८, २०८२ १०:२९

प्रतिक्रिया दिनुहोस्