राहत प्याकेजको माग गर्दै राष्ट्र बैंकलाई बुझायो खुद्रा व्यवसायी संघले ज्ञापनपत्र

अर्थ

गृहपृष्ठ
अर्थ
राहत प्याकेजको माग गर्दै राष्ट्र बैंकलाई बुझायो खुद्रा व्यवसायी संघले ज्ञापनपत्र

राहत प्याकेजको माग गर्दै राष्ट्र बैंकलाई बुझायो खुद्रा व्यवसायी संघले ज्ञापनपत्र

बिहीबार, असार ४, २०७७ बागेश्वरी पोस्ट

नेपालगञ्ज । खुद्रा व्यवसायी संघ नेपालगञ्जले नेपाल राष्ट्र बैंकलाई ज्ञापनपत्र बुझाएको छ ।

कोभिड–१९ का कारण चैत ११ गतेदेखि लागू भएको लामो लकडाउनले आफ्नो व्यापार व्यवसाय चौपट भएपछि संघले नेपाल राष्ट्र बैंकको ध्यानाकर्षण गराउँदै ज्ञापनपत्र बुझाएको हो ।

राष्ट्र बैंकले आफ्नो मौद्रिक नीतिमा प्याकेजमा आफूहरुका लागि राहतको व्यवस्था गर्नुपर्ने माग राख्दै खुद्रा व्यवसायी संघले आज राष्ट्र बैंकको नेपालगञ्ज कार्यालय मार्फत् केन्द्रिय कार्यालयमा ज्ञापनपत्र बुझाएको संघका अध्यक्ष शिव प्रसाद दाहालले बताउनुभयो ।लामो लकडाउनले आफ्नो व्यापार व्यवसाय ठप्प भएको र अहिले पनि जोखिम तीब्र गतिमा बढिरहेकाले सहजरुपमा व्यवसाय सञ्चालन हुन कति समय लाग्ने भन्नेबारे अन्यौल कायमै रहेकाले आफूहरुको मुद्दा सम्बोधनका लागि विशेष पहल गरिदिन आग्रह गर्दै ज्ञापनपत्र बुझाइएको अध्यक्ष दाहालले बताउनुभयो ।

ज्ञापनपत्रमा घरभाडा, बैंकको किस्ता र व्याज तिर्न आफूहरुले नसकिरहेको अवस्था रहेको उल्लेख गर्दै संघले खुद्रा व्यवसाय गर्नेहरुको पीडा बुझिदिन पनि आग्रह गरेको छ । सबै व्यवसायलाई सोलोडोलो एउटै ठाउँमा राखेर हेर्न नहुने भन्दै साना व्यवसायीको समस्या समाधानका लागि विशेष पहल गर्न ध्यानाकर्षण गराइएको छ ।

राष्ट्र बैंकमार्फत् नेपाल सरकार अर्थ मन्त्रालयको पनि ध्यानाकर्षण गराइएको ज्ञापनपत्रमा उल्लेख छ । ज्ञापनपत्र बुझ्दै नेपाल राष्ट्र बैंक नेपालगञ्ज कार्यालयका निर्देशक मुक्तिनाथ सापकोटाले खुद्रा व्यवसायी संघले भोगिरहेका समस्या समाधानका लागि पहल गर्ने आश्वासन दिनुभएको अध्यक्ष दाहालले बताउनुभयो ।

त्यस अवसरमा राष्ट्र बैंक नेपालगञ्ज कार्यालयका उपनिर्देशकद्वय माधव पोख्रेल र राजु पौडेल, खुद्रा व्यवसायी संघका निवर्तमान अध्यक्ष भीम बहादुर रानाभाट, उपाध्यक्ष हिमनाथ पौडेल, सचिव युवराज काफ्ले र व्यवसायी प्रकाश शर्माको उपस्थिति थियो ।