नेपालगञ्ज उपमहानगरपालिका स्वामित्वका सटरको भाडा नलिन खुद्रा व्यवसायीको आग्रह

अर्थ

गृहपृष्ठ
अर्थ
नेपालगञ्ज उपमहानगरपालिका स्वामित्वका सटरको भाडा नलिन खुद्रा व्यवसायीको आग्रह

नेपालगञ्ज उपमहानगरपालिका स्वामित्वका सटरको भाडा नलिन खुद्रा व्यवसायीको आग्रह

सोमबार, असार ८, २०७७ बागेश्वरी पोस्ट

नेपालगञ्ज । खुद्रा व्यवसायी संघ नेपालगञ्जले नेपालगञ्ज उपमहानगरपालिका समक्ष अभिभावकत्व ग्रहण गरी व्यवसायिक तथा घरबहाल करमा शतप्रतिशत छुट दिन अनुरोध गरेको छ ।

संकटको घडीमा स्थानीय सरकारले थोरै लगानी गरी जिविकोपार्जन गर्ने खुद्रा व्यवसायीहरुको मर्का बुझ्नुपर्ने भन्दै संघले विशेष राहत प्याकेज ल्याउन उपमहानगरपालिका समक्ष माग गरेको छ । बैंकमा खप्टिएको व्याज, घरभाडा र सरकारका विभिन्न अंगहरुलाई बुझाउनुपर्ने करका कारण व्यवसायिक पूँजी नै समाप्त हुने अवस्था आएको भन्दै खुद्रा व्यवसायी संघले उपमहानगरपालिकाको स्वामित्वमा रहेका सटरहरुको लकडाउन अवधिभरको भाडा छुट दिन अनुरोध गरेको संघका अध्यक्ष शिवप्रसाद दाहालले जानकारी दिनुभयो ।

मेयर डा.धवल शमशेर राणा र उपमेयर उमा थापा मगरलाई ज्ञापनपत्र बुझाउँदै संघले उपमहानगरले लकडाउन अवधिको घर भाडा छुट दिँदा नगरमा व्यक्तिगतरुपमा घर बहालमा लगाएका घरधनीहरुलाई पनि निर्णय लिन सहज हुने बताएको छ । सरकारले घरभाडा छुटका लागि आग्रह गरिसकेको भएपनि स्थानीय सरकारले पनि त्यसलाई कार्यान्वयनमा ल्याउनका लागि पहल गर्न जरुरी रहेको ज्ञापनपत्रमा उल्लेख छ ।

अध्यक्ष दाहाल र सचिव युवराज काफ्लेद्वारा हस्ताक्षरित ज्ञापनपत्रमा घरबारीटोलदेखि बागेश्वरी मन्दिर हुँदै त्रिवणी मोडसम्म पुग्ने बाटो निर्माणमा भएको ढिलाईका कारण आवागमनमा कठिनाई हुनुका साथै दर्शनार्थी र व्यवसायीलाई अप्ठेरो परको भन्दै छिटो बाटो निर्माण गरी आवागमन सहज बनाउन ध्यानाकर्षण समेत गराइएको छ । ज्ञापनपत्र बुझ्दै मेयर डा.राणाले लकडाउन अवधिभरको भाडा छुट दिने विषयमा उपमहानगरपालिकाले छिट्टै निर्णय लिने बताउँदै अन्य करमा पनि के कति छुट दिन सकिन्छ भन्ने विषयमा उचित निर्णय लिइने बताउनुभएको संघका अध्यक्ष दाहालले बताउनुभयो ।

त्यस क्रममा अध्यक्ष दाहाल, संस्थापक अध्यक्ष भिम रानाभाट, उपाध्यक्ष हिमनाथ पौडेल, उपाध्यक्ष (महिला) प्रतिमा लम्साल, सचिव काफ्ले, कोषाध्याक्ष नेत्र बहादुर बन्जारा लगायतको उपस्थिति थियो ।