३५ करोड लागतमा निर्मित ह्याप्पी वर्ल्ड फनपार्क आजदेखि संचालनमा [फोटो फिचर]

अर्थ

गृहपृष्ठ
अर्थ
३५ करोड लागतमा निर्मित ह्याप्पी वर्ल्ड फनपार्क आजदेखि संचालनमा [फोटो फिचर]

३५ करोड लागतमा निर्मित ह्याप्पी वर्ल्ड फनपार्क आजदेखि संचालनमा [फोटो फिचर]

सोमबार, कात्तिक २४, २०७७ बागेश्वरी पोस्ट

नेपालगन्ज । बाँकेको हवल्दारपुरमा ३५ करोड लागतमा निर्मित ह्याप्पी वर्ल्ड फनपार्क आजदेखि संचालनमा आएको छ । कोहलपुर नगरपालिकाको वडा नम्बर १४ हवल्दारपुरमा साढे तीन विगाहा क्षेत्रफलमा फैलिएको उक्त फनपार्कलाई कोरोना महामारीकै वीच स्वास्थ्य सुरक्षाका सम्पूर्ण मापदण्ड अपनाएर संचालनमा ल्याइएको ह्याप्पी वर्ल्ड फनपार्कका प्रवन्ध निर्देशक विजय भण्डारी (बासु)ले बताउनुभयो ।

भण्डारीले यो जिल्लाकै पहिलो फनपार्क भएपनि कोरोना भाइरसको जोखिमलाई मध्यनजर गर्दै केही समय ढिला गरी संचालनमा ल्याइएको बताउनुभयो । उद्घाटनका अवसरमा आज पहिलो दिन प्रवेश नि:शुल्क गरिएको फनपार्कमा स्काई साइक्लिङ्ग, जिप्ले, बुल राइड, जाइन्ट सिरिङ्ग, वाल क्लाइम्बिङ्ग र बच्चाहरुको लागि बन्जी लगायतका अन्य सुविधाहरु समेत रहेको भण्डारीले बताउनुभयो ।

नेपालगन्जका २५ जना प्रतिष्ठित ब्यापारीहरुको समूले संचालनमा ल्याएको ह्याप्पी वर्ल्डमा वाटर फनका साथै रेष्टुरेण्ट र ब्यांकेटसम्मको सुविधा छ । पहिलो दिन प्रवेश नि:शुल्क भएपनि फनपार्कभित्र गेमिङ्ग आनन्द लिन प्रत्येक इभेन्ट अनुसार १५० देखि २५० सम्म शुल्क निर्धारण गरिएको छ ।

कोरोनाको जोखिम कायमै रहेकाले तत्काल स्विमिङ्ग पुल लगायतका केही सुविधा बाहेक अन्य गेमहरु मात्र संचालन गरिएपनि केही समय पश्चात् पुन: सबै सुविधाहरु सहित फन पार्कको ग्राण्ड ओपेनिङ्ग गरिने भण्डारीले बताउनुभयो ।

ह्याप्पी वर्ल्ड बाँकेमा सबैभन्दा पहिले निर्माणको काम शुरु गरेको योजना हो । यस बाहेक राँझा नजिकको फनपार्क निर्माणाधीन अवस्थामा छ भने नेपालगन्जको भवानियापुरमा रहेको फनपार्क केही समयअघि सञ्चालनमा आइसकेको छ ।